پاکستان نے جنوبی کوریا کے خلاف ٹیسٹ سیریز کے پہلے میچ میں شاندار کھیل پیش کرتے ہوئے مہمان ٹیم کو ایک کے مقابلے میں 3 گول سے شکست دے کر سیریز کا فاتحانہ آغاز کر دیا۔
یہ بھی پڑھیں : ’میری وفاداری عہدے سے نہیں پاکستان سے ہے‘، قومی ہاکی ٹیم کی کپتانی سے ہٹائے جانے پر عماد بٹ کا ردعمل
میچ کے موقع پر بین الصوبائی رابطہ (آئی پی سی) کے سیکریٹری اور پاکستان ہاکی فیڈریشن (پی ایچ ایف) کے صدر محی الدین احمد وانی، جنوبی کوریا کے سفیر پارک کی جون سمیت دیگر معزز شخصیات بھی موجود تھیں۔ اس موقع پر یہ بھی بتایا گیا کہ پاکستان میں کھیلے جانے والے اس میچ کی تفصیلات پہلی مرتبہ انٹرنیشنل ہاکی فیڈریشن کے ٹورنامنٹ مینجمنٹ سسٹم میں شائع کی گئیں، جسے ملکی ہاکی کے لیے ایک اہم پیش رفت قرار دیا جا رہا ہے۔
میچ کا پہلا کوارٹر بغیر کسی گول کے برابر رہا تاہم دوسرے کوارٹر میں قومی ٹیم نے جارحانہ انداز اپنایا۔ 21ویں منٹ میں محمد سفیان خان نے پینلٹی کارنر پر گیند کو جال کی راہ دکھاتے ہوئے پاکستان کو 1-0 کی برتری دلائی۔
مزید پڑھیے: پاکستان ہاکی ٹیم 8 برس بعد ورلڈ کپ میں پہنچ گئی، محسن نقوی کی کھلاڑیوں کو مبارکباد
جنوبی کوریا نے 29ویں منٹ میں واپسی کرتے ہوئے ینگ جی ہان کے پینلٹی کارنر گول کی بدولت مقابلہ 1-1 سے برابر کر دیا تاہم پاکستان نے ہاف ٹائم سے قبل دوبارہ برتری حاصل کر لی۔ 30ویں منٹ میں محمود ابوبکر نے خوبصورت فیلڈ گول اسکور کرکے قومی ٹیم کو 2-1 کی سبقت دلائی۔
تیسرے کوارٹر میں 38ویں منٹ پر محمد سفیان خان نے اپنا دوسرا اور پاکستان کا تیسرا گول اسکور کیا جس کے بعد جنوبی کوریا میچ میں واپسی نہ کر سکا اور پاکستان نے مقابلہ 3-1 سے اپنے نام کر لیا۔
میچ میں ایمپائرنگ کے فرائض ہارون رشید اور یاسر خورشید نے انجام دیے جبکہ محمد جاوید ٹیکنیکل آفیسر رہے۔ وقاص احمد اور مرزا جاوید نے ججز کی ذمہ داریاں نبھائیں۔
مزید پڑھیے: پاکستان ہاکی ٹیم کی جانب سے ملائیشیا میں ہوٹل بلز کی عدم ادائیگی کا انکشاف
اس موقعے پر ٹیکنیکل ڈیلیگیٹ شفیق بھٹی، ایمپائر منیجر فیض محمد فیضی، میڈیا کوآرڈینیٹر محمد وقاص شیخ، پی ایچ ایف کیمپ کوآرڈینیٹر لیفٹیننٹ کرنل (ر) عبدالناصر اخونزادہ، چیف کوآرڈینیٹر اینڈ آپریشن نجیب خٹک اور دیگر آفیشلز بھی موجود تھے۔
