سپریم کورٹ آف پاکستان نے بانی پاکستان تحریکِ انصاف (پی ٹی آئی) کی اسپتال منتقلی کی درخواست پر رجسٹرار آفس کی جانب سے عائد کردہ اعتراضات کو کالعدم قرار دیتے ہوئے چیمبر اپیل منظور کر لی ہے۔
تفصیلات کے مطابق بانی پی ٹی آئی کی اسپتال منتقلی سے متعلق درخواست پر رجسٹرار آفس کے اعتراضات کے خلاف چیمبر میں اہم سماعت ہوئی۔ سماعت کے دوران بانی پی ٹی آئی کے وکیل عذیر کرامت بھنڈاری چیف جسٹس کے سامنے چیمبر میں پیش ہوئے۔
یہ بھی پڑھیے بانی پی ٹی آئی عمران خان کی اسپتال منتقلی کے لیے سپریم کورٹ میں درخواست دائر
چیف جسٹس نے وکیل کے دلائل سننے کے بعد بانی پی ٹی آئی کی چیمبر اپیل کو منظور کرتے ہوئے رجسٹرار سپریم کورٹ کے اعتراضات کو ختم کر دیا اور ہدایت کی کہ درخواست پر فوری طور پر نمبر الاٹ کیا جائے۔ اس موقع پر چیف جسٹس نے وکیل عذیر بھنڈاری کو دستخط شدہ وکالت نامے جلد جمع کرانے کی بھی ہدایت کی۔
چیف جسٹس نے معاملے کی اہمیت کو مدنظر رکھتے ہوئے بانی پی ٹی آئی کی اسپتال منتقلی کی اپیل کو عظمیٰ خان کے کیس کے ساتھ منسلک کرنے کا حکم دیا۔ علاوہ ازیں، عدالتِ عظمیٰ نے بانی پی ٹی آئی اور عظمیٰ خان کی درخواستوں کو جلد سماعت کے لیے مقرر کرنے کی استدعا بھی منظور کر لی ہے۔
