ہالی ووڈ اداکار ٹام ہالینڈ نے اشارہ دیا ہے کہ آئندہ آنے والی فلم Spider-Man: Brand New Day ان کی بطور اسپائیڈر مین آخری فلم ہو سکتی ہے۔ اداکار نے انکشاف کیا ہے کہ وہ مارول کے ساتھ مل کر اس منصوبے پر کام کر رہے ہیں کہ مستقبل میں یہ مشہور کردار کس انداز میں نئے اداکار کے حوالے کیا جائے گا۔
انہوں نے کہا کہ ان کے ذہن میں اس بات کا واضح تصور موجود ہے کہ اسپائیڈر مین کی ذمہ داری اگلے اداکار کو کس انداز میں منتقل کی جائے گی اگرچہ وقت کے ساتھ منصوبے میں تبدیلی آ سکتی ہے۔ ٹام ہالینڈ کے مطابق وہ سب سے زیادہ اس بات پر پُرجوش ہیں کہ مستقبل میں اسپائیڈر مین کا کردار ادا کرنے والے نئے فنکار کی رہنمائی کریں۔
یہ بھی پڑھیں: کیا ’اسپائیڈر مین: برانڈ نیو ڈے‘ مارول کی سب سے جذباتی اور یادگار فلم بننے جا رہی ہے؟
یاد رہے کہ ٹام ہالینڈ نے 2016 میں Captain America: Civil War کے ذریعے مارول سنیماٹک یونیورس میں اسپائیڈر مین کے طور پر ڈیبیو کیا تھا۔ اس کے بعد انہوں نے Spider-Man: Homecoming، Spider-Man: Far From Home اور Spider-Man: No Way Home سمیت متعدد کامیاب فلموں میں مرکزی کردار ادا کیا جبکہ مختلف Avengers فلموں میں بھی نظر آئے۔
ٹام ہالینڈ سے قبل ٹوبی میگوائر اور اینڈریو گارفیلڈ بھی اسپائیڈر مین کا کردار ادا کر چکے ہیں جبکہ مداح اب یہ جاننے کے لیے بے تاب ہیں کہ مستقبل میں یہ مشہور سپر ہیرو کس نئے اداکار کے حصے میں آئے گا۔
یہ بھی پڑھیں: کیا سام سنگ کے نئے فولڈ ایبل فون کا سب سے بڑا راز اسپائیڈر مین نے فاش کر دیا؟
ایک حالیہ انٹرویو میں ٹام ہالینڈ نے ابھرتے ہوئے نوجوان اداکار اوون کوپر کو مستقبل کے اسپائیڈر مین کے لیے موزوں انتخاب قرار دیتے ہوئے ان کی صلاحیتوں کی بھی تعریف کی۔
