آزاد کشمیر میں پیپلز پارٹی کا مینڈیٹ چوری کیا گیا، ن لیگ کی الٹی گنتی شروع ہو چکی ہے، بلاول بھٹو

چیئرمین پاکستان پیپلز پارٹی (پی پی پی) بلاول بھٹو زرداری نے کہا ہے کہ آزاد کشمیر قانون ساز اسمبلی کے انتخابات میں بڑے پیمانے پر دھاندلی کی گئی اور عوامی مینڈیٹ چرایا گیا، تاہم اس کے باوجود عوام نے مسلم لیگ (ن) کی دھونس کا مقابلہ کرتے ہوئے پیپلز پارٹی کو 9 نشستوں پر کامیاب کرایا۔ ن لیگ کے لیے میرا پیغام ہے کہ اب آپ کی الٹی گنتی شروع ہو چکی ہے۔

اپنے ویڈیو پیغام میں بلاول بھٹو زرداری نے کہا کہ آزاد کشمیر کے غیور عوام نے تمام تر دھونس اور دھمکیوں کے باوجود پیپلز پارٹی کو مینڈیٹ دیا، ہم چوری کیا گیا مینڈیٹ واپس لیں گے۔

ہماری حق حاکمیت، حق ملکیت اور حق روزگار کی جدوجہد جاری رہے گی اور یہ تحریک اب کشمیر اور گلگت بلتستان کے پہاڑوں تک محدود نہیں رہے گی۔
انشاء اللہ تعالیٰ حق حاکمیت، حق ملکیت اور حق روزگار کی تحریک کو میں پورے پاکستان میں چلاؤں گا۔
میرا مسلم لیگ نواز کے دوستوں کے لئے بس اتنا پیغام ہے… pic.twitter.com/DlgQcDGZdG

— Bilawal Bhutto Zardari (@BBhuttoZardari) August 3, 2026

مزید پڑھیں: آزاد کشمیر انتخابات میں مسلم لیگ ن کی جیت مخالفین کو ہضم نہیں ہورہی، عطاتارڑ

چیئرمین پیپلز پارٹی نے دعویٰ کیاکہ آزاد کشمیر کے انتخابات شفاف نہیں تھے بلکہ یہ دھاندلی زدہ اور خونی الیکشن تھے۔

انہوں نے الزام عائد کیاکہ آزاد کشمیر میں پیپلز پارٹی کا مینڈیٹ چرایا گیا، تاہم تمام تر حالات کے باوجود پارٹی کارکنوں اور ووٹرز نے بھرپور مزاحمت کی۔

بلاول بھٹو زرداری نے کہاکہ آزاد کشمیر کے غیور اور بہادر عوام کو سلام پیش کرتا ہوں، جنہوں نے مسلم لیگ (ن) کی دھونس اور دھاندلی کا مقابلہ کیا۔

انہوں نے کہاکہ پیپلز پارٹی کے کارکنوں نے قربانیاں دیں اور شہادتیں قبول کیں۔ قائم مقام صدر آزاد کشمیر پر حملہ کیا گیا جبکہ ہمارے ایک ایم این اے کو گولی ماری گئی۔

چیئرمین پیپلز پارٹی نے کہا کہ 4 اگست کو مظفرآباد میں ہونے والی پولنگ کے دوران ووٹرز بازل نقوی اور جاوید ایوب کو کامیاب بنائیں۔

انہوں نے اعلان کیا کہ وہ باغ میں ایک عوامی جلسے سے بھی خطاب کریں گے، انہوں نے پونچھ کے عوام سے بھی پیپلز پارٹی کا ساتھ دینے کی اپیل کی۔

مزید پڑھیں: پیپلز پارٹی کا آزاد کشمیر الیکشن میں دھاندلی کا الزام، نتائج تسلیم نہ کرنے کا اعلان کردیا

بلاول بھٹو زرداری نے کہاکہ پاکستان پیپلز پارٹی کبھی میدان نہیں چھوڑتی۔ حق حاکمیت اور حق ملکیت کی تحریک اب صرف آزاد کشمیر اور گلگت بلتستان تک محدود نہیں رہے گی بلکہ اسے پورے ملک تک لے کر جاؤں گا۔