دنیا بھر میں طاقت کے تعین کا معیار تیزی سے تبدیل ہو رہا ہے، جہاں محض عسکری صلاحیت ہی نہیں اب معیشت، ٹیکنالوجی اور سفارتی مہارت کو بھی فیصلہ کن حیثیت حاصل ہوتی جا رہی ہے۔
پاکستان کے ماہرین اور تھینک ٹینکس کے مطابق پاکستان کی طویل المدتی سلامتی اور عالمی سطح پر اثر و رسوخ کا انحصار اب متوازن سفارت کاری، معاشی استحکام، تکنیکی ترقی اور اسٹریٹجک خودمختاری اپنانے پر ہے۔
واضح رہے کہ سرد جنگ کے خاتمے کے بعد سے عالمی طاقت کے تصور میں بتدریج تبدیلی آتی رہی ہے، تاہم گزشتہ چند برسوں میں یہ تبدیلی مزید تیز ہو گئی ہے۔
یہ بھی پڑھیں:امریکا ایران مذاکرات حتمی مرحلے میں داخل، پاکستان کی کامیاب سفارتکاری نے دنیا کو بڑی مشکل سے بچا لیا
آج کی دنیا میں ریاستیں اپنے مفادات کے تحفظ اور دیگر ممالک کے طرزِ عمل کو متاثر کرنے کے لیے معاشی دباؤ، ٹیکنالوجی پر پابندیاں، مالیاتی اثر و رسوخ، سائبر صلاحیتیں، تجارتی پالیسیاں، سپلائی چینز اور اطلاعاتی مہمات جیسے ہتھیار استعمال کر رہی ہیں، جسے عمومی طور پر ‘جاندار سفارت کاری’ کا نام دیا جاتا ہے۔
معاشی پابندیاں اور ٹیکنالوجی کی جنگ
ماہرین کے مطابق معاشی پابندیاں اب ریاستوں کے طرزِ عمل کو متاثر کرنے کا ایک طاقتور ذریعہ بن چکی ہیں۔
جدید ٹیکنالوجیز کی برآمد پر عائد پابندیاں یہ طے کرتی ہیں کہ مستقبل کی صنعتوں تک کن ممالک کی رسائی ہوگی۔ اسی طرح مالیاتی نظام، سرمایہ کاری کی نگرانی، سائبر کارروائیاں اور اسٹریٹجک ابلاغ بھی سفارتی نتائج کا تعین کرنے میں کلیدی کردار ادا کر رہے ہیں۔
کئی مواقعوں پر یہ تمام ہتھیار بغیر کسی گولی چلائے ہی سیاسی مقاصد حاصل کر لیتے ہیں۔ پاکستان کے لیے اس کا مطلب یہ ہے کہ قومی سلامتی کو اب صرف فوجی عینک سے نہیں دیکھا جا سکتا۔
معاشی مضبوطی بطور اسٹریٹجک اثاثہ
تجزیہ کاروں کا کہنا ہے کہ کسی ملک کے معاشی جھٹکوں کو برداشت کرنے، جدید صنعتیں تیار کرنے، ٹیکنالوجی تک رسائی حاصل کرنے اور قابلِ اعتماد اداروں کی تعمیر کی صلاحیت اب اتنی ہی اہم ہو چکی ہے جتنی کہ عسکری طاقت اہم ہے، یہ واضح ہے کہ معاشی استحکام اب محض ترقیاتی ہدف نہیں رہا بلکہ ایک اسٹریٹجک اثاثہ بن چکا ہے۔
کثیر قطبی عالمی نظام کی جانب سفر
عالمی نظام تیزی سے کثیر قطبی ہوتا جا رہا ہے۔ امریکا اب بھی فوجی طاقت، جدت اور مالیات کے میدان میں پیش پیش ہے، جبکہ چین صنعتی ترقی، بنیادی ڈھانچے کی تعمیر اور عالمی رابطہ کاری کے منصوبوں کے ذریعے ایک بڑی معاشی اور تکنیکی طاقت بن کر ابھرا ہے۔
مزید پڑھیں:امن کے لیے پاکستان کی کامیاب سفارتکاری، عالمی سطح پر پذیرائی، بھارت میں شدید ردعمل
یورپ سلامتی اور مسابقت کے مابین توازن قائم رکھتے ہوئے اسٹریٹجک مضبوطی میں سرمایہ کاری کر رہا ہے، جبکہ خلیجی ممالک، متحدہ عرب امارات اور ترکیہ جیسی علاقائی طاقتیں کسی ایک بڑی طاقت پر انحصار کم کرنے کے لیے اپنی سفارتی اور معاشی شراکت داریوں کو مؤثر بنا رہی ہیں۔
پاکستان کے لیے موقع اور چیلنج
ماہرین کے مطابق اس بدلتے ہوئے عالمی منظرنامے میں پاکستان کے لیے مواقع اور چیلنجز دونوں موجود ہیں۔
پاکستان کو عالمی مسابقت کو حریف بلاکس کے مابین انتخاب کے طور پر دیکھنے کے بجائے ایک متوازن خارجہ پالیسی اپنانی چاہیے، جو اپنے قومی مفادات کا تحفظ کرتے ہوئے تمام بڑی طاقتوں کے ساتھ تعمیری روابط بھی برقرار رکھے۔
چین، امریکا، یورپ، خلیجی ریاستوں، وسطی ایشیا اور وسیع تر مسلم دنیا کے ساتھ تعلقات کو ایک متنوع سفارتی حکمتِ عملی کے تکمیلی اجزا کے طور پر دیکھا جانا چاہیے۔
اسٹریٹجک خودمختاری پاکستان کا رہنما اصول ہونی چاہیے، تاکہ وہ اپنے قومی مفادات کی بنیاد پر خودمختار فیصلے کرنے کی صلاحیت برقرار رکھتے ہوئے باہمی مفاد کے حامل ہر شعبے میں معاشی اور سفارتی روابط کو وسعت دے سکے۔
جغرافیائی محلِ وقوع، پاکستان کا قدرتی فائدہ
ماہرین کے مطابق پاکستان کے پاس ایسی جغرافیائی اسٹرٹیجک طاقت موجود ہے جو بدلتے عالمی نظام میں اس کی پوزیشن مضبوط بنا سکتی ہے۔
جنوبی ایشیا، وسطی ایشیا، مشرقِ وسطیٰ اور چین کے سنگم پر واقع اس کا جغرافیائی محلِ وقوع علاقائی رابطہ کاری اور تجارت کے لیے بے پناہ صلاحیت رکھتا ہے۔
یہ بھی پڑھیں:پاکستان کی کامیاب سفارتکاری، دنیا جنگ کے ساتھ ساتھ معاشی تباہی سے بھی بچ گئی
نقل و حمل کے نیٹ ورکس، لاجسٹکس، توانائی راہداریوں اور سرحد پار تجارت کو بہتر بنانے کے اقدامات پاکستان کو محض ایک گزرگاہ سے ایک علاقائی معاشی مرکز میں تبدیل کر سکتے ہیں۔
ٹیکنالوجی اور جدت میں سرمایہ کاری ناگزیر
ماہرین کی رپورٹ کے مطابق مصنوعی ذہانت، سائبر سیکیورٹی، کوانٹم کمپیوٹنگ، جدید مینوفیکچرنگ، بائیوٹیکنالوجی اور ڈیجیٹل بنیادی ڈھانچہ آنے والے عشروں میں پاکستان کی مسابقت کا تعین کریں گے۔
تعلیم، سائنسی تحقیق، ڈیجیٹل مہارتوں اور جدت کے ماحولیاتی نظام میں سرمایہ کاری پاکستان کو عالمی معیشت میں زیادہ مؤثر طریقے سے مقابلہ کرنے اور بیرونی ٹیکنالوجیز پر انحصار کم کرنے کے قابل بنائے گی۔
خلیجی ریاستیں پہلے ہی جدید ٹیکنالوجی، قابلِ تجدید توانائی، مصنوعی ذہانت، لاجسٹکس، سیاحت اور مالیاتی خدمات میں بھاری سرمایہ کاری کر رہی ہیں، جو معاشی تنوع اور تکنیکی قیادت کے ذریعے قومی سلامتی مضبوط بنانے کے طویل المدتی وژن کی عکاسی کرتی ہے۔
دفاع کے ساتھ ساتھ موسمیاتی تبدیلی اور معاشی بہبود بھی اہم
ماہرین کے مطابق دفاعی صلاحیتیں ہمیشہ اہم رہیں گی، مگر یہ جامع قومی طاقت کا محض ایک جزو ہیں۔ معاشی استحکام، توانائی و خوراک کی سلامتی، ادارہ جاتی ساکھ، تکنیکی جدت، عوامی صحت اور موسمیاتی موافقت اب براہِ راست کسی ملک کی خودمختاری کے تحفظ اور طویل المدتی مفادات کے حصول کی صلاحیت میں کردار ادا کرتے ہیں۔
پاکستان دنیا کے موسمیاتی طور پر سب سے زیادہ حساس ممالک میں شمار ہوتا ہے، جہاں سیلاب، پانی کی قلت، شدید گرمی کی لہریں اور زرعی مسائل معاشی ترقی اور سماجی استحکام کو براہِ راست متاثر کرتے ہیں۔ اسی لیے موسمیاتی لچک کو قومی منصوبہ بندی، بنیادی ڈھانچے کی تعمیر اور خوراک کی سلامتی کا لازمی حصہ بنانا ایک اسٹریٹجک ضرورت بن چکا ہے۔
پاکستان کا مستقبل اور عالمی سیاست
ماہرین کا کہنا ہے کہ پاکستان میں عوامی مکالمے کو بھی ان بدلتی حقیقتوں کے مطابق ڈھالنے کی ضرورت ہے، کیونکہ بین الاقوامی تعلقات اب اتحادی اور حریف کے سادہ فرق تک محدود نہیں رہے۔
یہ بھی پڑھیں:خطے میں بدلتے حالات: پاکستان نے بھارت کے ’علاقائی غلبے اور عالمی سپر پاور‘ بننے کا خواب کیسے چھینا؟
آج ممالک اکثر ایک شعبے میں مسابقت اور دوسرے میں تعاون کرتے نظر آتے ہیں۔ ماہرین کے مطابق پاکستان کے پالیسی ساز، کاروباری ادارے، جامعات اور تحقیقی ادارے سب اس بدلتے ہوئے اسٹریٹجک ماحول کے لیے ملک کو تیار کرنے میں اہم کردار ادا کر سکتے ہیں۔
معاشی مسابقت کو بہتر بنانا، طرزِ حکمرانی میں بہتری، ٹیکنالوجی میں سرمایہ کاری، علاقائی رابطہ کاری کو وسعت دینا اور شواہد پر مبنی پالیسی سازی کو فروغ دینا پاکستان کی بیرونی دباؤ کے خلاف مزاحمت بڑھانے کے ساتھ ساتھ ترقی کے نئے مواقع بھی پیدا کرے گا۔
ماہرین کے بقول پاکستان کو 21 ویں صدی کے چیلنجز کا سامنا 20 ویں صدی کی سوچ کے ساتھ نہیں کرنا چاہیے، بلکہ اسے ایک پراعتماد، لچکدار اور مستقبل بین ریاست کے طور پر خود کو منوانا ہوگا جو مواقع پیدا کرنے کی صلاحیت رکھتی ہو، نہ کہ محض حالات پر ردعمل دینے تک محدود رہے۔
