جماعت اسلامی نے مہنگائی، پیٹرولیم مصنوعات کی بڑھتی قیمتوں اور حکومتی پالیسیوں کے خلاف احتجاج کا آغاز کردیا ہے، جماعت اسلامی کی جانب سے لاہور میں احتجاجی ریلی بھی نکالی گئی ہے۔
لاہور میں وی نیوز سے گفتگو کرتے ہوئے جماعت اسلامی کے رہنما قیصر شریف نے کہا کہ یہ مظاہرہ امیر جماعت اسلامی حافظ نعیم الرحمٰن کی ہدایت پر کیا جا رہا ہے، جس کا مقصد عوام کو درپیش مسائل کے خلاف آواز بلند کرنا ہے۔
انہوں نے کہا کہ حکومت پیٹرولیم مصنوعات پر عائد ٹیکسز اور پیٹرولیم لیوی ختم کرے، کیونکہ بلاوجہ قیمتیں آسمان تک پہنچ چکی ہیں۔ ان کا مطالبہ ہے کہ پیٹرول کی قیمتیں عالمی سطح کے مطابق کم کی جائیں۔
قیصر شریف نے کہا کہ یہ ایک پُرامن احتجاج ہے اور جماعت اسلامی عوامی حقوق کے حصول کے لیے اپنی جدوجہد جاری رکھے گی۔
انہوں نے کہا کہ یہ احتجاجی مہم کا آغاز ہے، آنے والے دنوں میں بھی یہ سلسلہ جاری رہے گا، جب تک حکومت اپنی عوام دشمن پالیسیوں اور فیصلوں پر نظرثانی نہیں کرتی اور عوام کو ریلیف فراہم نہیں کرتی۔
جماعت اسلامی کے رہنما نے کہا کہ اگر عوام کو مسلسل ریلیف نہ ملا تو امیر جماعت اسلامی تمام سیاسی، سماجی، قانونی اور اخلاقی راستے اختیار کرنے پر غور کر رہے ہیں۔
انہوں نے کہا کہ جماعت اسلامی نے ماضی میں بھی بڑے احتجاج کیے ہیں اور عوام کے حقوق کے لیے ہر ممکن جدوجہد جاری رکھے گی۔
قیصر شریف نے واضح کیا کہ احتجاج پُرامن ہوگا اور حکومت سے مطالبہ ہے کہ عوام کو مہنگائی، خاص طور پر پیٹرولیم مصنوعات کی قیمتوں میں اضافے سے نجات دلائی جائے۔
