چین میں ورزش کو صرف کھیل کے بجائے صحت مند زندگی کا لازمی حصہ بنانے کی کوششیں تیز کردی گئی ہیں، جہاں شہریوں کو گھر کے قریب کھیلوں کی سہولتیں، ماہرین کی رہنمائی اور طبی نگرانی فراہم کی جارہی ہے۔ ملک بھر میں فٹنس مراکز اور عوامی کھیلوں کے میدانوں میں اضافے کے ساتھ مصنوعی ذہانت اور جدید ٹیکنالوجی کو بھی ورزش کا حصہ بنایا جارہا ہے۔
چین میں 71 سالہ رین داقنگ کی مثال اس نئی حکمت عملی کی دلچسپ تصویر پیش کرتی ہے۔ دل کے عارضے کے باعث وہ پہلے ورزش کرنے سے گھبراتے تھے، تاہم اب وہ کمیونٹی کلینک میں ماہر فٹنس کوچ کی نگرانی میں ٹریڈمل پر ورزش کرتے ہیں جبکہ طبی عملہ ان کی صحت کی نگرانی بھی کرتا ہے۔
August 8 marks China's National Fitness Day, the tradition started in 2008 when China hosted the Beijing Summer Olympics and Paralympic Games. Let's take a look at how people in China stay fit! #NationalFitnessDay pic.twitter.com/zAdXNbQu4A
— China News 中国新闻网 (@Echinanews) August 7, 2026
چین میں ایسے مراکز کی تعداد بڑھ رہی ہے جہاں ورزش کے ساتھ جسمانی فٹنس اور دل و پھیپھڑوں کی کارکردگی کا جائزہ لیا جاتا ہے اور ہر فرد کے لیے اس کی ضرورت کے مطابق ورزش کا منصوبہ تیار کیا جاتا ہے۔
چین نے 2014 میں ملک گیر فٹنس کو قومی حکمت عملی کا درجہ دیا تھا، جبکہ ’ہیلتھی چائنا 2030‘ منصوبے کے تحت صحت مند طرز زندگی کے فروغ پر توجہ بڑھائی گئی۔ رواں سال جاری کیے گئے 2026 تا 2030 کے قومی فٹنس منصوبے میں 2030 تک تقریباً 40 فیصد آبادی کو باقاعدگی سے ورزش کی طرف لانے کا ہدف مقرر کیا گیا ہے۔
یہ بھی پڑھیں:اسمارٹ آلات اور جدید مینوفیکچرنگ سے چین کی مشینری صنعت میں نمایاں ترقی
2025 کے اختتام تک چین میں 50 لاکھ سے زیادہ کھیلوں کے مقامات قائم ہوچکے تھے۔ ’15 منٹ فٹنس سرکل‘ کے تحت کوشش کی جارہی ہے کہ شہریوں کو اپنے گھروں سے مختصر فاصلے پر ورزش کی سہولت میسر ہو۔ حتیٰ کہ پلوں کے نیچے، پرانی صنعتی جگہوں اور عمارتوں کی چھتوں کو بھی کھیلوں کے مراکز میں تبدیل کیا جارہا ہے۔
چین میں فٹنس کی رہنمائی کے لیے 39 لاکھ سے زیادہ سماجی کھیلوں کے انسٹرکٹرز اور رضاکار بھی کام کررہے ہیں، جبکہ اسمارٹ جم اور مصنوعی ذہانت پر مبنی کوچنگ سسٹم ورزش کو مزید آسان اور انفرادی ضرورت کے مطابق بنا رہے ہیں۔
On China's 18th National Fitness Day, discover how "15-minute fitness circle" is bringing sports facilities closer to communities across the country. #NationalFitnessDay #FitnessForAll #ChinaLife #SmartCities #AmazingChina pic.twitter.com/X4jEBbItiE
— China Xinhua News (@XHNews) August 8, 2026
حکومت کی توجہ صرف بڑوں تک محدود نہیں۔ اسکولوں میں روایتی کھیل، فٹبال، مقامی مقابلے اور دیگر سرگرمیاں بھی مقبول ہورہی ہیں۔ عام شہریوں کی شرکت سے ہونے والے کھیلوں کے مقابلوں نے چین میں کھیلوں کی ثقافت کو مزید مضبوط کیا ہے۔
یوں چین میں فٹنس کا تصور محض ورزش کرنے سے آگے بڑھ کر بیماریوں سے بچاؤ، صحت مند طرز زندگی اور کمیونٹی کی سطح پر بہتر صحت کے انتظام تک پہنچ رہا ہے۔
