سربراہ پاکستان ڈیموکریٹک موومنٹ (پی ڈی ایم) مولانا فضل الرحمان نے کہا ہے کہ چیئرمین پی ٹی آئی کی حکومت جانے پر موم بتی مافیا، اسرائیل اور یہودی لابی رو رہی ہے۔ امریکی کانگریس میں فرینڈز آف اسرائیل کمیٹی بھی چیئرمین پی ٹی آئی کے لیے فکر مند ہے۔
ٹانک میں تقریب سے خطاب کرتے ہوئے مولانا فضل الرحمان نے کہا کہ ہم نے پہلے ہی کہا تھا پی ٹی آئی کے پاس بیرونی ایجنڈا ہے۔ ہم نے پی ٹی آئی حکومت کے خلاف علم حق بلند کیا، ہم نے تحریک انصاف کا ایجنڈا پاش پاش کر دیا، ملک دشمن عناصر پی ٹی آئی کی حمایت میں سامنےآ گئے۔ عمران کا تختہ الٹ دیا ہے آئندہ کوئی اس کے اقتدار میں آنے کا خواب بھی نہیں دیکھے گا، دجالی فتنے کا خاتمہ کر دیا گیا ہے، یہ دوبارہ سر نہیں اٹھا سکے گا۔
مولانا کا کہنا تھا کہ لمبے عرصے سے دنیا میں سیکولر پاکستان کا نقشہ پیش کیا جا رہا ہے۔ برطانیہ میں کنزرویٹیو فرینڈز آف اسرائیل کے نام سے بنی تنظیم جسے عمران خان کا سابق سسرال چلا رہا ہے اور امریکا میں فرینڈز آف اسرائیل کمیٹی عمران حکومت کے خاتمے پر دلگرفتہ ہیں، پاکستان دشمن لابی عمران خان کی حامی ہے۔ لیکن اگلے الیکشن اور اس کے بعد بھی دنیا میں پاکستان کی اسلامی شناخت کو متعارف کروایا جائے گا۔
انہوں نے کہا کہ پی ٹی آئی نے ملک میں معاشی اور سیاسی عدم استحکام پیدا کیا تاکہ ملک کو زمین بوس کر دیا جائے، پھر اس کے بعد انہوں نے ملک کے دفاعی نظام پر حملہ کیا تاکہ فوج آپس میں لڑ پڑے اور ملک کا آخری دفاعی نظام بھی ٹوٹ جائے۔
