واٹس ایپ نے آئی فون صارفین کے لیے اپنے ویڈیو پلیئر کو نئے انداز میں پیش کرنے کی تیاری شروع کردی ہے جس میں ویڈیو کنٹرولز کو ایپل کے جدید ’لیکوئڈ گلاس‘ ڈیزائن کے مطابق تبدیل کیا جا رہا ہے۔ نئی تبدیلی کے تحت ویڈیو دیکھنے کا انٹرفیس پہلے سے زیادہ شفاف اور جدید دکھائی دے گا۔
ٹیکنالوجی سے متعلق معلومات فراہم کرنے والی ویب سائٹ ’ڈبلیو اے بیٹا انفو‘ کے مطابق واٹس ایپ کے نئے ویڈیو پلیئر کو فی الحال محدود بیٹا صارفین کے لیے جاری کیا جا رہا ہے۔ یہ فیچر آئی او ایس کے بیٹا ورژن 26.39.10.70 میں دیکھا گیا ہے جو ایپل کے ٹیسٹ فلائٹ پروگرام کے ذریعے دستیاب ہے۔
ویڈیو پلیئر میں کیا تبدیلیاں ہوں گی؟
نئے ڈیزائن میں سب سے نمایاں تبدیلی ویڈیو کی پروگریس بار میں کی گئی ہے جو اب اسکرین کے اوپری حصے میں دکھائی دے گی۔ اس کے کنارے گول ہوں گے جبکہ شفاف پس منظر اسے شیشے جیسا منفرد انداز دے گا۔
یہ بھی پڑھیں: کتاب کی طرح کھلنے اور بند ہونے والا آئی فون، قیمت آپ کے ہوش اڑا دے گی
رپورٹ کے مطابق پروگریس بار کی ظاہری شکل آئی فون کی ڈسپلے سیٹنگز کے مطابق تبدیل ہوگی۔ لائٹ موڈ میں یہ سفید اور شفاف دکھائی دے گی جبکہ ڈارک موڈ میں اس کا پس منظر گہرا ہوگا۔
اس کے علاوہ ویڈیو پلیئر کے نچلے حصے میں موجود پلے، توقف اور دیگر کنٹرولز کے ڈیزائن کو بھی بہتر بنایا جا رہا ہے تاکہ پورا انٹرفیس ایپل کے جدید ڈیزائن سے ہم آہنگ ہو سکے۔
کن صارفین کو نئی اپ ڈیٹ ملے گی؟
فی الحال یہ فیچر صرف آئی فون پر واٹس ایپ کے منتخب بیٹا ٹیسٹرز کے لیے دستیاب ہے۔ تاہم بیٹا ورژن استعمال کرنے والے تمام صارفین کو بھی یہ سہولت فوری طور پر نہیں ملے گی کیونکہ کمپنی اسے مرحلہ وار جاری کر رہی ہے۔
یہ بھی پڑھیں: واٹس ایپ: لنکڈ ڈیوائسز پر چیٹ بند ہو جائے گی، یہ فیچر کس کا راستہ روکنے کے لیے ہے؟
ڈبلیو اے بیٹا انفو کے مطابق نئے ویڈیو پلیئر کا ڈیزائن آئی پیڈ اور میک پر واٹس ایپ کے لیے بھی متعارف کرایا جا رہا ہے۔
عام صارفین کو اپ ڈیٹ کب ملے گی؟
واٹس ایپ نے تاحال اس فیچر کو تمام صارفین کے لیے جاری کرنے کی حتمی تاریخ کا اعلان نہیں کیا۔
یہ بھی پڑھیں: کیا آپ کا واٹس ایپ کوئی اور بھی استعمال کر رہا ہے؟ ایک سیٹنگ چیک کریں، حقیقت سامنے آجائے گی
کمپنی پہلے ہی اپنے انٹرفیس کے مختلف حصوں، جن میں چیٹ اسکرینز، نیویگیشن بارز اور پیغامات کے مینیو شامل ہیں، میں لیکوئڈ گلاس ڈیزائن کے عناصر شامل کر رہی ہے۔ اب ویڈیو پلیئر کو بھی اسی انداز میں ڈھالا جا رہا ہے۔
واضح رہے کہ اس اپ ڈیٹ میں بنیادی تبدیلی ویڈیو پلیئر کی ظاہری شکل اور کنٹرولز کے ڈیزائن میں ہوگی۔ فی الحال ویڈیو دیکھنے کے لیے کسی نئی سہولت کے اضافے کی اطلاع نہیں دی گئی۔
