ایف آئی ایچ مینز ہاکی ورلڈ کپ 2026 کے دوسرے مرحلے تک رسائی کے لیے پاکستان کی امیدوں کو اس وقت تقویت ملی جب ناقابل شکست انگلینڈ نے بدھ کو اپنے آخری پول ڈی میچ میں ویلز کو 8-2 سے شکست دے کر ٹورنامنٹ سے باہر کردیا۔
یہ بھی پڑھیں: ہاکی ورلڈ کپ، پاکستان کو افتتاحی میچ میں انگلینڈ کے ہاتھوں شکست
انگلینڈ کی اس کامیابی کے بعد پاکستان کے لیے اگلے مرحلے تک پہنچنے کا منظرنامہ واضح ہوگیا ہے۔ قومی ٹیم اس وقت پول ڈی میں ایک پوائنٹ اور منفی 3 گول فرق کے ساتھ تیسرے نمبر پر موجود ہے اور اب اسے اگلے مرحلے میں جگہ بنانے کے لیے روایتی حریف بھارت کے خلاف میچ میں کامیابی حاصل کرنی ہوگی۔
پاکستان کی بھارت کے خلاف میچ میں شکست یا برابری کی صورت میں قومی ٹیم کا ورلڈ کپ سفر ختم ہوجائے گا جبکہ بھارت دوسرے مرحلے کے لیے کوالیفائی کر جائے گا۔
اس سے قبل بھی پاکستان کی اگلے مرحلے تک رسائی کی امیدوں کو اُس وقت سہارا ملا تھا جب بھارت کو پیر کے روز پول ڈی کے دوسرے میچ میں انگلینڈ کے ہاتھوں 4-2 سے شکست کا سامنا کرنا پڑا تھا۔ اس نتیجے نے ابتدائی راؤنڈ کے آخری میچز سے قبل گروپ میں کوالیفکیشن کی دوڑ کو کھلا رکھا۔
مزید پڑھیے: پاکستان ہاکی ٹیم کے دورۂ جنوبی کوریا کا اعلان، 4 میچز کھیلے جائیں گے
پاکستان نے اس عالمی مقابلے میں مایوس کن آغاز کیا تھا اور پہلے میچ میں انگلینڈ کے خلاف اسے 4-1 سے شکست ہوئی تھی۔ اس کے بعد ابو بکر کی قیادت میں قومی ٹیم نے ویلز کے خلاف سنسنی خیز مقابلے میں 3-3 سے برابر کھیلتے ہوئے ایک قیمتی پوائنٹ حاصل کیا اور اگلے مرحلے تک پہنچنے کی امیدیں برقرار رکھیں۔
ورلڈ کپ کے فارمیٹ کے مطابق ہر گروپ کی ابتدائی 2 ٹیمیں دوسرے پول مرحلے میں پہنچیں گی جہاں مجموعی طور پر 8 ٹیمیں شامل ہوں گی۔
پول اے اور پول ڈی کی ٹاپ 2 ٹیمیں پول ای میں شامل ہوں گی جبکہ پول بی اور پول سی کی ابتدائی 2 ٹیمیں پول ایف تشکیل دیں گی۔
مزید پڑھیں: سابق اولمپیئن رحیم خان کو پاکستان کی ہاکی ورلڈ کپ میں کامیابی پر شکوک
ابتدائی 4 پولز میں آخری دو پوزیشن حاصل کرنے والی ٹیمیں ٹورنامنٹ سے باہر ہوجائیں گی۔
