وفاقی وزیر مملکت برائے داخلہ طلال چوہدری نے پاکستان تحریک انصاف (پی ٹی آئی) پر طنز کرتے ہوئے کہا ہے کہ جس دن سے بانی پی ٹی آئی عمران خان کے صحت مند ہونے کی خبر آئی ہے ان کے چاہنے والوں میں سے کسی نے شکر ادا نہیں کیا، سب افسردہ اور غصے میں ہیں اور کہتے ہیں کہ حکومت سے بدلہ لینا ہے۔
نجی ٹی وی سے گفتگو کرتے ہوئے طلال چوہدری نے کہاکہ مسئلہ یہ ہے کہ علاج کے لیے کہا گیا ہے اور علاج بیمار کا ہوتا ہے، اگر کوئی بیمار نہ ہو اور زبردستی اپنی مرضی کے اسپتال میں علاج کرانے کی خواہش ہو تو اس کے پیچھے یہی ہوسکتا ہے کہ بیماری کا بہانہ بنا کر این آر او لے لیا جائے۔
وزیر مملکت برائے داخلہ نے کہاکہ نہ کوئی ڈیل ہے اور نہ ہی کوئی ڈھیل، یہ سب کہانیاں ہیں جو صرف پی ٹی آئی بنا رہی ہے۔
مولانا فضل الرحمان کے حوالے سے طلال چوہدری کا کہنا تھا کہ مولانا اپوزیشن اسپیشلسٹ ہیں، وہ سینیئر سیاستدان ہیں، اچھی بات ہے کہ مولانا اپوزیشن کو حزب اختلاف کا کردار ادا کرنے کا طریقہ سکھائیں۔
امریکا ایران جنگ کے حوالے سے وزیر مملکت نے کہا کہ امریکا ایران جنگ بندی میں پاکستان کا اہم کردار رہا ہے اور پوری دنیا نے پاکستان کی کوششوں کو تسلیم کیا ہے۔
طلال چوہدری کا کہنا تھا کہ اس وقت پاکستان کی سفارت کاری عروج پر ہے، قیام پاکستان سے اب تک سفارتی محاذ پر پاکستان کا یہ عروج کبھی نہیں دیکھا گیا۔
انہوں نے کہا کہ اس کا کریڈٹ وزیراعظم شہباز شریف اور فیلڈ مارشل سید عاصم منیر کو جاتا ہے، اللہ تعالیٰ فیلڈ مارشل کو کامیاب کرے، ان کا حالیہ دورہ ایران کامیاب رہا تو یہ دنیا کے لیے ریلیف فراہم کرے گا۔
