ہری پور میں 16 روز قبل لاپتا ہونے والی 5 سالہ بچی آیت نور کو، جس کی لاش ایک کنویں سے ملی تھی، سپرد خاک کردیا گیا۔
آیت نور 16 روز قبل اپنے گھر سے کھیلنے کے لیے نکلی تھی، جس کے بعد وہ لاپتا ہوگئی تھی۔
لاپتا ہونے کے 15 روز بعد بچی کی لاش ایک کنویں سے برآمد ہوئی، جس کے بعد پورا شہر سوگ میں ڈوب گیا۔
یہ بھی پڑھیں: سرگودھا: 7 سالہ بچی زیادتی و قتل کیس کے مرکزی ملزم سمیت 4 گرفتار
پولیس کے مطابق واقعے کی تحقیقات کے دوران سی سی ٹی وی فوٹیج کی مدد سے بچی کے اغوا میں مبینہ طور پر ملوث 5 مشتبہ افراد کی شناخت کی گئی ہے۔
پولیس نے 3 ملزمان کو گرفتار کرلیا ہے جبکہ دیگر 2 کی گرفتاری کے لیے مختلف مقامات پر تلاش جاری ہے۔
ہری پور میں 5 سالہ معصوم بچی آیت نور کو اغواء کر کے جنسی زیادتی کا نشانہ بنایا اور پھر اسے قتل کرکے لاش کو کنویں میں چھپا دیا آج اس بچی کی لاش 15 دنوں کے بعد یونیورسٹی روڈ پر ایک پرانے کنویں سے مل گئی ہے، تین دن لگاتار احتجاج ہوا تو پولیس حرکت میں آئی #JusticeForAyatNoor pic.twitter.com/mpgZB5C8Yd
— Masha (@MashaNoor0) August 24, 2026
پولیس کا کہنا ہے کہ گرفتار کیے گئے تینوں ملزمان نے مبینہ طور پر مجسٹریٹ کے سامنے اعتراف کیا کہ انہوں نے بچی کو زیادتی کا نشانہ بنایا اور بعدازاں اسے کنویں میں پھینک دیا۔
پولیس کی متعدد ٹیمیں گزشتہ 5 روز سے مختلف مقامات پر سرچ آپریشنز میں مصروف ہیں اور واقعے کی مزید تحقیقات جاری ہیں۔
مزید پڑھیں: بچیوں سے زیادتی کے ملزم پر عدالت کے احاطے میں تشدد
آیت نور کے افسوسناک قتل پر ہری پور ڈسٹرکٹ بار نے بھی یوم سوگ منانے کا اعلان کیا ہے۔
بچی کی ہلاکت پر شہریوں میں شدید غم و غصہ پایا جاتا ہے۔ نماز جنازہ میں بڑی تعداد میں لوگوں کی شرکت نے واقعے پر عوامی تشویش اور انصاف کے مطالبے کو نمایاں کیا۔
شہریوں نے مطالبہ کیا ہے کہ بچی کے قتل میں ملوث تمام ملزمان کو گرفتار کرکے قانون کے مطابق سخت سزا دی جائے۔
