تھانہ ترنول پولیس نے بروقت کارروائی کرتے ہوئے ایبٹ آباد سے 10 کروڑ روپے تاوان کے لیے اغوا کیے گئے 12 سالہ عبداللہ ابراہیم کو بحفاظت بازیاب کرا لیا۔ پولیس نے مغوی بچے کے چچا زاد بھائی سمیت 3 ملزمان کو گرفتار کرلیا۔
اسلام آباد پولیس کے ترجمان کے مطابق ترنول پولیس نے چیکنگ کے دوران ایک گاڑی کو روکا تو پچھلی نشست پر 12 سالہ بچہ خوف زدہ حالت میں موجود تھا۔ پولیس کو شک ہونے پر مزید پوچھ گچھ کی گئی اور بچے کو اعتماد میں لیا گیا، جس پر اس نے بتایا کہ اسے ایبٹ آباد سے اغوا کرکے اسلام آباد لایا جا رہا ہے۔
یہ بھی پڑھیے گھریلو ناچاقی پر 2خواتین کا قتل، اسلام آباد پولیس نے 48 گھنٹوں میں ملزمان گرفتار کرلیے
ایس ایس پی آپریشنز اسلام آباد قاضی علی رضا کے مطابق مرکزی ملزم محمد اویس مغوی بچے کا چچا زاد بھائی ہے، جو بچے کے والد سے 10 کروڑ روپے تاوان کا مطالبہ کر رہا تھا۔ پولیس نے فوری کارروائی کرتے ہوئے بچے کو محفوظ تحویل میں لے لیا اور مرکزی ملزم اویس سمیت 3 ملزمان کو گرفتار کرلیا۔ گرفتار دیگر ملزمان میں محمد نیاز اور علی احمد شامل ہیں۔
ایس ایس پی آپریشنز نے کہا کہ اسلام آباد پولیس کی مؤثر چیکنگ، پیشہ ورانہ صلاحیت اور بروقت ردعمل کے باعث اغوا برائے تاوان کی سنگین واردات ناکام بنائی گئی۔ انہوں نے کہا کہ شہریوں کے جان و مال کا تحفظ اسلام آباد پولیس کی اولین ترجیح ہے۔
یہ بھی پڑھیے غوری ٹاؤن میں سیکیورٹی چارجز کے نام پر بھتہ وصول کرنے والے 2 ملزمان گرفتار
مغوی بچے کے والدین نے اپنے لختِ جگر کی بحفاظت بازیابی پر خوشی کا اظہار کرتے ہوئے اسلام آباد پولیس کا شکریہ ادا کیا۔ پولیس کے مطابق گرفتار ملزمان سے مزید تفتیش جاری ہے۔
