ایشین گیمز: پاکستان والی بال ٹیم سیمی فائنل میں ایران سے ہار گئی، اب کانسی کے تمغے کے لیے میدان میں اترے گی

جاپان میں جاری ایشین گیمز مینز والی بال کے سیمی فائنل میں ایران نے پاکستان کو مسلسل 3 سیٹس میں شکست دے کر ٹائٹل کی دوڑ سے باہر کر دیا ہے۔ قومی ٹیم اب ہفتے کو کانسی کے تمغے کے حصول کے لیے چین یا جاپان سے مقابلہ کرے گی۔

جاپان کے شہر اوکازاکی میں کھیلے گئے سیمی فائنل میں ایرانی ٹیم نے شاندار کھیل کا مظاہرہ کرتے ہوئے گرین شرٹس کو 0-3 سے شکست دی۔

اوکازاکی چوو سوگو پارک جمنیزیم میں کھیلے گئے اس میچ میں ایران نے 13-25، 15-25 اور 11-25 کے اسکور کے ساتھ فیصلہ کن کامیابی حاصل کی۔

یہ بھی پڑھیں:ایشین گیمز اسکواش: پاکستان کو فائنل میں ملائیشیا کے ہاتھوں شکست، ملک کے لیے پہلا سلور میڈل جیت لیا

میچ کے آغاز سے ہی پاکستانی ٹیم اپنا ردھم تلاش کرنے میں ناکام رہی۔ ایران نے پہلے سیٹ میں 13-25 سے کامیابی حاصل کر کے برتری قائم کی، جسے دوسرے سیٹ میں 15-25 کی جیت کے ساتھ مزید مضبوط کر لیا۔

تیسرے سیٹ میں بھی پاکستان کے لیے کوئی واپسی ممکن نہ ہو سکی اور ایران نے 11-25 سے سیٹ جیت کر ٹھیک ایک گھنٹے میں میچ کا خاتمہ کرتے ہوئے فائنل کے لیے کوالیفائی کر لیا۔

ایرانی ٹیم کی بالادستی اور اعداد و شمار

میچ کے دوران ایرانی ٹیم نے اٹیک میں واضح برتری ثابت کی۔ ایران کا اسپائکس پر کامیابی کا تناسب 64 فیصد رہا جبکہ پاکستان صرف 34 فیصد تک محدود رہا۔

نیٹ پر بھی ایرانی کھلاڑیوں کا غلبہ رہا جنہوں نے بلاکس میں 32 فیصد کامیابی حاصل کی، اس کے برعکس پاکستان کی شرح محض 4 فیصد رہی۔

میچ کے اختتام پر ایران کے کل پوائنٹس 75 تھے جبکہ پاکستان کی ٹیم صرف 39 پوائنٹس بنا سکی۔ سروس لائن پر بھی ایران کو سبقت حاصل رہی جس نے 4 سروس پوائنٹس حاصل کیے جبکہ پاکستان 2 پوائنٹس ہی لے سکا۔

پاکستانی کھلاڑیوں کی کارکردگی

پاکستان کی جانب سے عثمان فریاد علی 11 پوائنٹس کے ساتھ ٹاپ اسکورر رہے، جو تمام اسپائکس کے ذریعے حاصل ہوئے۔

مزید پڑھیں:ایشین گیمز: جی ایم بشیر نے ریپڈ فائر پسٹل میں کانسی کا تمغہ جیت لیا، پاکستان کے تمغوں کی تعداد 6 ہو گئی

مراد خان نے 9 پوائنٹس بنائے جن میں 8 اسپائکس اور ایک بلاک شامل تھا۔ آفاق خان نے 3، جبکہ جبران اور مصور خان نے 2، 2 پوائنٹس کا حصہ ڈالا۔ حامد یزمان اور مراد جہان نے ایک، ایک پوائنٹ اسکور کیا۔

کانسی کے تمغے کے لیے اگلا معرکہ

واضح رہے کہ ایک روز قبل ہی پاکستان نے بہترین کھیل پیش کرتے ہوئے روایتی حریف بھارت کو 0-3 سے ہرا کر سیمی فائنل میں جگہ بنائی تھی۔

ٹائٹل کی دوڑ سے باہر ہونے کے بعد اب پاکستانی ٹیم ہفتے کے روز کانسی کے تمغے کے لیے میدان میں اترے گی۔ اس اہم میچ میں گرین شرٹس کا مقابلہ چین اور جاپان کے درمیان ہونے والے دوسرے سیمی فائنل میں شکست کھانے والی ٹیم سے ہوگا۔