پاکستان کرکٹ ٹیم کی ٹی20 قیادت گزشتہ 3 برس کے دوران مسلسل تبدیلیوں کی زد میں رہی ہے۔ نومبر 2023 میں بابر اعظم کے تینوں فارمیٹس کی کپتانی سے مستعفی ہونے کے بعد شروع ہونے والا یہ سلسلہ اکتوبر 2026 تک جاری رہا، اور اس دوران پاکستان نے ٹی20 ٹیم کے 5 مختلف مستقل یا باقاعدہ کپتان دیکھے، جبکہ قیادت کئی مرتبہ بدلی۔
یہ سلسلہ ایسے وقت میں ایک بار پھر نمایاں ہوا ہے جب پاکستان کرکٹ بورڈ نے سلمان علی آغا کو ٹی20 کپتانی سے ہٹا کر صاحبزادہ فرحان کو سری لنکا کے خلاف 3 ٹی20 میچز کے لیے کپتان مقرر کیا ہے۔
مزید پڑھیں:بابراعظم سمیت 17 پاکستانی کرکٹرز انٹرنیشنل لیگ ٹی 20 نیلامی کے لیے رجسٹر
نومبر 2023: بابر اعظم کا استعفیٰ، شاہین کو ٹی20 قیادت
2023 کے ون ڈے ورلڈ کپ میں پاکستان کی مایوس کن کارکردگی کے بعد بابر اعظم نے 15 نومبر 2023 کو تینوں فارمیٹس کی کپتانی سے استعفیٰ دے دیا۔ بابر 2020 سے پاکستان کی قیادت کر رہے تھے اور بعد میں ون ڈے اور ٹیسٹ ٹیموں کی کپتانی بھی سنبھالی تھی۔
بابر کے استعفے کے بعد پاکستان کرکٹ بورڈ نے شاہین شاہ آفریدی کو ٹی20 ٹیم کا کپتان مقرر کیا، جبکہ ٹیسٹ ٹیم کی قیادت شان مسعود کو سونپی گئی۔ ون ڈے کپتان کا فیصلہ بعد میں کیا گیا۔
مارچ 2024: شاہین کی مختصر کپتانی کا خاتمہ، بابر کی واپسی
شاہین شاہ آفریدی کی ٹی20 کپتانی زیادہ عرصہ برقرار نہ رہ سکی۔ مارچ 2024 میں نیوزی لینڈ کے خلاف سیریز سے قبل انہیں قیادت سے ہٹا کر بابر اعظم کو دوبارہ ٹی20 کپتان بنا دیا گیا۔
یوں بابر اعظم نے کپتانی چھوڑنے کے قریباً 4 ماہ بعد ہی مختصر فارمیٹ کی قیادت دوبارہ سنبھال لی۔
اکتوبر 2024: بابر پھر مستعفی، رضوان نئے سفید گیند کپتان
بابر اعظم کی دوسری کپتانی بھی زیادہ دیر نہ چل سکی۔ اکتوبر 2024 میں انہوں نے ایک بار پھر سفید گیند کی ٹیم کی کپتانی سے استعفیٰ دے دیا۔ پی سی بی کے مطابق بابر نے اپنی توجہ بیٹنگ پر مرکوز کرنے کے لیے یہ فیصلہ کیا تھا۔
27 اکتوبر 2024 کو محمد رضوان کو ون ڈے اور ٹی20 دونوں ٹیموں کا کپتان مقرر کر دیا گیا، جبکہ سلمان علی آغا کو نائب کپتان بنایا گیا۔
رضوان کی غیر موجودگی میں سلمان علی آغا نے زمبابوے کے خلاف ٹی20 سیریز میں قیادت بھی کی۔
مارچ 2025: ٹی20 قیادت سلمان علی آغا کے سپرد
مارچ 2025 میں پی سی بی نے ٹی20 ٹیم کی قیادت میں ایک اور تبدیلی کرتے ہوئے سلمان علی آغا کو مستقل ٹی20 کپتان مقرر کر دیا، جبکہ محمد رضوان ون ڈے کپتان برقرار رہے۔ شاداب خان کو سلمان کا نائب کپتان بنایا گیا۔
پی سی بی نے اس فیصلے کو آئندہ ایشیا کپ اور 2026 کے ٹی20 ورلڈ کپ کی تیاریوں سے بھی جوڑا تھا۔
اکتوبر 2026: سلمان کی جگہ صاحبزادہ فرحان
اب قریباً ڈیڑھ سال بعد ٹی20 قیادت ایک بار پھر تبدیل ہوگئی ہے۔ 5 اکتوبر 2026 کو پی سی بی نے اعلان کیا کہ صاحبزادہ فرحان سری لنکا کے خلاف 3 ٹی20 میچز میں پاکستان کی قیادت کریں گے۔
فرحان حال ہی میں ختم ہونے والے ایشین گیمز میں بھی پاکستان کی قیادت کر چکے ہیں۔ سری لنکا کے خلاف ٹی20 سیریز کے میچز 9، 11 اور 13 اکتوبر کو راولپنڈی میں کھیلے جائیں گے۔
دلچسپ بات یہ ہے کہ سلمان علی آغا کو نہ صرف ٹی20 کپتانی سے ہٹایا گیا بلکہ سری لنکا کے خلاف ٹی20 اسکواڈ میں بھی شامل نہیں کیا گیا۔
کپتانی کی تبدیلیوں کا سلسلہ
یوں نومبر 2023 سے اکتوبر 2026 تک پاکستان کی ٹی20 قیادت کا سفر کچھ یوں رہا: بابر اعظم، شاہین شاہ آفریدی، بابر اعظم، محمد رضوان، سلمان علی آغا، صاحبزادہ فرحان یعنی صرف 3 برس کے دوران ٹی20 قیادت میں 5 کپتان تبدیل ہوئے، جبکہ بابر اعظم کو اس عرصے میں 2 مرتبہ کپتانی چھوڑنے اور دوبارہ سنبھالنے کا تجربہ ہوا۔
یہ بھی واضح رہے کہ تمام تبدیلیاں ایک ہی نوعیت کی نہیں تھیں۔ بعض فیصلے تینوں فارمیٹس یا سفید گیند کی مجموعی قیادت سے متعلق تھے، جبکہ بعد کے فیصلے خاص طور پر ٹی20 ٹیم تک محدود رہے۔
Pakistan squads announced for Sri Lanka T20Is and ODI tri-series
Details here ➡️ https://t.co/K5Do0qhuXa
#PAKvSL | #PAKvENG https://t.co/vYNzuSU0jn
— PCB Media (@TheRealPCBMedia) October 5, 2026
ون ڈے میں بھی تبدیلیاں جاری رہیں
کپتانی کا یہ اتار چڑھاؤ صرف ٹی20 تک محدود نہیں رہا۔ اکتوبر 2024 میں محمد رضوان کو ون ڈے کپتان بنایا گیا، تاہم اکتوبر 2025 میں پی سی بی نے شاہین شاہ آفریدی کو ون ڈے کپتان مقرر کرکے رضوان کی جگہ لے لی۔
مزید پڑھیں:آئی سی سی کی نئی رینکنگ: بابراعظم اور محمد عباس کی ترقی، رضوان سمیت کئی کھلاڑی تنزلی کا شکار
اکتوبر 2026 کی موجودہ صورتحال میں شاہین ہی ون ڈے ٹیم کے کپتان ہیں اور انگلینڈ اور سری لنکا کے ساتھ آئندہ 3 ملکی سیریز میں قیادت کریں گے۔
یوں موجودہ صورتحال میں ٹی20 میں صاحبزادہ فرحان جبکہ ون ڈے میں شاہین شاہ آفریدی پاکستان کی قیادت کریں گے۔
