پاکستان کرکٹ ٹیم کے سابق کپتان اور مایہ ناز فاسٹ بولر وسیم اکرم نے 50 سال سے زائد عمر کے افراد کو موبائل فون اور سوشل میڈیا کے استعمال میں کمی لانے کا مشورہ دیتے ہوئے کہا ہے کہ زندگی میں اہل خانہ اور عزیزوں کے ساتھ معیاری وقت گزارنے اور صحت مند طرزِ زندگی کو ترجیح دینی چاہیے۔
وسیم اکرم نے انسٹاگرام پر شیئر کی گئی ایک ویڈیو میں اپنی عمر کے افراد کے لیے موبائل فون، واٹس ایپ اور سوشل میڈیا کے ذمہ دارانہ استعمال سے متعلق چند تجاویز پیش کیں۔
ان کا کہنا تھا کہ موبائل فون کے استعمال میں صرف تھوڑی سی کمی بھی روزمرہ زندگی میں مثبت تبدیلی لا سکتی ہے۔
یہ بھی پڑھیں: ’یہ ٹیلنٹ تو پہلے کبھی نہیں دیکھا‘، وسیم اکرم نے فخر عالم کی ڈانس ویڈیو سوشل میڈیا پر شیئر کردی
سابق کپتان نے لوگوں کو روزانہ غیر ضروری پیغامات اور مختلف ویڈیوز دوسروں کو بھیجنے سے گریز کرنے کا مشورہ دیا۔
ان کے مطابق بار بار غیر ضروری مواد شیئر کرنا دوسروں کے لیے پریشانی کا باعث بن سکتا ہے، موبائل فون کی اسٹوریج بھی استعمال کرتا ہے اور وصول کنندگان کو ایسے پیغامات دیکھنے پر مجبور کرتا ہے جن میں شاید ان کی دلچسپی نہ ہو۔
Former Pakistan captain Wasim Akram shares some simple phone etiquette tips, especially for the older generation, including why people should avoid forwarding unnecessary good morning messages. 📱😄
Which phone habit annoys you the most? Share in the comments! 👇#TOKSports… pic.twitter.com/ulH2aeZdpi
— TOK Sports (@TOKSports021) October 17, 2026
وسیم اکرم نے بالخصوص ’گڈ مارننگ‘ جیسے غیر ضروری پیغامات اور طویل ویڈیوز آگے بھیجنے پر بات کرتے ہوئے کہا کہ لوگوں کی توجہ برقرار رکھنے کی صلاحیت کم ہو رہی ہے، اس لیے طویل ویڈیوز بھیجنے سے گریز کرنا چاہیے۔
انہوں نے کہا کہ کوئی بھی شخص آدھے گھنٹے کی ویڈیو دیکھنے میں دلچسپی نہیں رکھتا، چاہے اس میں کتنی ہی اہم معلومات کیوں نہ ہوں۔
ان کے بقول، 2 منٹ سے زیادہ دورانیے کی ویڈیوز بھیجنے سے گریز کرنا چاہیے۔
مزید پڑھیں: وسیم اکرم اور شنیرا کی محبت، ازدواجی زندگی اور کرکٹ پر کھل کر گفتگو
سابق فاسٹ بولر نے مزید کہا کہ نئی نسل، خصوصاً جنریشن زی اور جنریشن الفا، ڈیجیٹل دور میں پروان چڑھی ہے، اس لیے ان کے لیے ہر وقت موبائل فون استعمال کرنا معمول کی بات ہو سکتی ہے۔
تاہم، بڑی عمر کے افراد کو ہر وقت فون پر دستیاب رہنے کی ضرورت محسوس نہیں کرنی چاہیے۔
وسیم اکرم نے اپنی مثال دیتے ہوئے بتایا کہ وہ بھی موبائل فون پر ریلز شیئر کرنے اور پیغامات کے جوابات دینے میں وقت صرف کرتے تھے، تاہم وہ اس استعمال کو ایک حد میں رکھنے کی اہمیت پر زور دیتے ہیں۔
دوسری جانب وسیم اکرم کی آسٹریلوی نژاد اہلیہ شنیرا اکرم نے مزاحیہ انداز میں کہا کہ 50 سال سے کم عمر افراد پیغامات بھیجنا جاری رکھ سکتے ہیں۔
وسیم اکرم کا یہ پیغام ایسے وقت میں سامنے آیا ہے جب موبائل فون اور سوشل میڈیا روزمرہ زندگی کا اہم حصہ بن چکے ہیں اور ان کے استعمال میں توازن برقرار رکھنے کی اہمیت پر بھی زور دیا جا رہا ہے۔
