آئی سی سی انڈر 19 ویمنز ٹی 20 ورلڈ کپ 2027 کا آغاز 21 جنوری سے بنگلہ دیش اور نیپال میں ہوگا جہاں 16 ٹیمیں ٹورنامنٹ کے تیسرے ایڈیشن میں ٹائٹل کے لیے مدمقابل ہوں گی۔
یہ بھی پڑھیں: پاکستان انڈر 19 نے انگلینڈ کو 200 رنز سے شکست دے کر سیریز جیت لی
یہ ٹورنامنٹ پہلی بار سنہ 2023 میں منعقد ہوا تھا اور اس بار دونوں میزبان ممالک کے 4 مختلف وینیوز پر کل 41 میچز کھیلے جائیں گے۔ ٹورنامنٹ میں شریک ٹیموں کو 4 گروپوں میں تقسیم کیا گیا ہے، ہر گروپ میں 4 ٹیمیں شامل ہیں۔
ٹورنامنٹ کے وینیوز
بیر شریستھا شہید فلائٹ لیفٹیننٹ مطیع الرحمان کرکٹ اسٹیڈیم، چٹگرام
سلہٹ انٹرنیشنل کرکٹ اسٹیڈیم، سلہٹ
ٹی یو انٹرنیشنل کرکٹ اسٹیڈیم، کھٹمنڈو
اپر ملپانی انٹرنیشنل کرکٹ گراؤنڈ، کھٹمنڈو
گروپس کی تفصیل
گروپ اے: بھارت، آئرلینڈ، ویسٹ انڈیز اور نیپال
گروپ بی: جنوبی افریقہ، نیوزی لینڈ، پاکستان اور ساموا
گروپ سی: آسٹریلیا، بنگلہ دیش، نائیجیریا اور متحدہ عرب امارات
گروپ ڈی: انگلینڈ، سری لنکا، امریکا اور اسکاٹ لینڈ
افتتاحی دن
ٹورنامنٹ کا آغاز 21 جنوری کو ہوگا پہلے ہی دن 8 ٹیمیں 4 میچز میں ایکشن میں ہوں گی جس میں میزبان بنگلہ دیش کا مقابلہ یو اے ای سے ہوگا۔
دوسرے میزبان نیپال اپنی مہم کا آغاز 22 جنوری کو آئرلینڈ کے خلاف کرے گا جبکہ دفاعی چیمپیئن بھارت اپنا پہلا میچ ویسٹ انڈیز کے خلاف کھیلے گی۔
آئی سی سی کے چیف ایگزیکٹو سنجوگ گپتا نے ٹورنامنٹ کو ویمنز کرکٹ میں بڑھتے ہوئے ٹیلنٹ کو اجاگر کرنے کے لیے ایک اہم پلیٹ فارم قرار دیا۔
انہوں نے کہا کہ آئی سی سی انڈر 19 ویمنز ٹی 20 ورلڈ کپ ویمنز کرکٹ کی ترقی میں اہم کردار ادا کرتا ہے جو نوجوان کھلاڑیوں کو اپنے ایج گروپ میں اعلیٰ ترین سطح پر مقابلہ کرنے اور عالمی اسٹیج پر تجربہ حاصل کرنے کا موقع فراہم کرتا ہے۔
انہوں نے مزید کہا کہ بنگلہ دیش اور نیپال میں 16 ٹیموں کو اکٹھا کرنے سے کرکٹ کی بڑی اور ابھرتی ہوئی قوموں کی کھلاڑیوں کو بین الاقوامی مقابلوں کے ذریعے ترقی کا موقع ملے گا۔
گروپ مرحلہ 26 جنوری تک جاری رہے گا جس کے بعد کوالیفائی کرنے والی ٹیمیں سپر سکس مرحلے میں پہنچیں گی جہاں انہیں 2 گروپس میں تقسیم کیا جائے گا۔ ہر سپر سکس گروپ سے ٹاپ 2 ٹیمیں سیمی فائنل کے لیے کوالیفائی کریں گی۔
سیمی فائنلز 4 فروری کو بیر شریستھا شہید فلائٹ لیفٹیننٹ مطیع الرحمان کرکٹ اسٹیڈیم میں ہوں گے جبکہ 5 فروری کو ریزرو ڈے کے طور پر رکھا گیا ہے۔
مزید پڑھیں: انڈر 19 ویمنز ٹی 20 ٹرائی سیریز : سری لنکا نے پاکستان کو شکست دے کر ٹورنامنٹ سے باہر کردیا
فائنل میچ 6 فروری کو دوپہر ڈیڑھ بجے مقامی وقت کے مطابق کھیلا جائے گا جبکہ 7 فروری کو ریزرو ڈے مقرر کیا گیا ہے۔
