بھارتی اداکار امیتابھ بچن کے گھر اور گلوکار دلجیت دوسانجھ کے کنسرٹ کو نشانہ بنانے کی دھمکیاں موصول ہوئی ہیں، جس کے بعد ممبئی میں سیکیورٹی ادارے متحرک ہوگئے ہیں۔
بھارتی میڈیا کے مطابق ممبئی میئر ریتو تاوڈے کے دفتر کو دھمکی آمیز ای میل موصول ہوئی، جس میں امیتابھ بچن کے جوہو میں واقع بنگلے ’جلسہ‘ اور 27 نومبر کو دلجیت دوسانجھ کے کنسرٹ پر حملے کی دھمکی دی گئی۔ ای میل میں شہر کے بعض اسکولوں اور میئر کے دفتر کو بھی نشانہ بنانے کا ذکر کیا گیا تھا۔
#Bomb threat email to #Mumbai Mayor, targets #AmitabhBachchan’s bungalow ‘Jalsa’, #Diljit’s #concert | 📢🌍 Catch the day's latest news here ➠ https://t.co/cSte0sDe40 🗞️ pic.twitter.com/obBQqORo3A
— Economic Times (@EconomicTimes) October 23, 2026
ممبئی پولیس کے مطابق دھمکی آمیز ای میل ملنے کے بعد میونسپل کارپوریشن کے دفتر کی تلاشی لی گئی، تاہم وہاں کوئی مشکوک چیز نہیں ملی۔ پولیس حکام کا کہنا ہے کہ ای میل بھیجنے والے کی شناخت اور دھمکیوں کی حقیقت جاننے کے لیے تحقیقات جاری ہیں، جبکہ متعلقہ مقامات پر سیکیورٹی بڑھانے کے اقدامات بھی کیے گئے ہیں۔
بھارتی میڈیا کے مطابق ای میل میں امیتابھ بچن کے گھر پر 31 اکتوبر سے 27 نومبر کے درمیان حملے کی دھمکی بھی دی گئی۔ دلجیت دوسانجھ کا کنسرٹ 27 نومبر کو ممبئی کے علاقے مہالکشمی ریس کورس میں شیڈول ہے۔
یہ دھمکیاں ایسے وقت سامنے آئی ہیں جب رواں ماہ 18 اکتوبر کو ممبئی کے علاقے جوہو میں اداکار ٹائیگر شروف کی گاڑی پر فائرنگ کا واقعہ پیش آیا تھا۔ اس واقعے میں اداکار محفوظ رہے تھے، تاہم دو افراد زخمی ہوئے تھے۔
