وزیراعظم شہباز شریف، نائب وزیراعظم اسحاق ڈار اور فیلڈ مارشل سید عاصم منیر سے سنگاپور کے وزیر خارجہ ڈاکٹر ویویان بالاکرشنن کی اہم ملاقاتیں ہوئی ہیں جن میں، تجارت، سرمایہ کاری، ڈیجیٹل معیشت، فنی تربیت اور علاقائی تعاون کے فروغ کو نئی وسعت دینے پر اتفاق ہوا ہے۔
سنگاپور کے وزیر خارجہ کے دورہ اسلام آباد کے دوران پاکستان اور سنگاپور نے دوطرفہ اقتصادی و سفارتی تعلقات کو مزید وسعت دینے، تجارت و سرمایہ کاری بڑھانے اور باہمی تعاون کے نئے مواقع سے فائدہ اٹھانے کے عزم کا اظہار کیا ہے، جبکہ دونوں ممالک کے درمیان براہِ راست پروازوں کی ممکنہ بحالی پر بھی بات چیت ہوئی ہے۔
یہ بھی پڑھیں:پاکستان اور سنگاپور کے درمیان تجارت، سرمایہ کاری اور تعلیمی تعاون بڑھانے پر اتفاق، وزرائے خارجہ کی مشترکہ بریفنگ
سنگاپور کے وزیر خارجہ ڈاکٹر ویویان بالاکرشنن نے پاکستان کے اعلیٰ سول اور عسکری قیادت سے اہم ملاقاتیں کیں، جن میں وزیراعظم شہباز شریف، نائب وزیراعظم و وزیر خارجہ اسحاق ڈار اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر شامل ہیں۔
وزیراعظم شہباز شریف سے ملاقات
وزیراعظم ہاؤس میں ہونے والی ملاقات میں وزیراعظم شہباز شریف اور سنگاپور کے وزیر خارجہ ڈاکٹر ویویان بالاکرشنن نے دوطرفہ تعلقات کو مضبوط بنانے اور اقتصادی تعاون کے نئے امکانات تلاش کرنے پر تفصیلی تبادلہ خیال کیا۔
Minister for Foreign Affairs of Singapore Dr. Vivian Balakrishnan called on Prime Minister Muhammad Shehbaz Sharif in Islamabad, today. https://t.co/xjLQAD4Zva
— Prime Minister’s Office (@PakPMO) October 30, 2026
ملاقات میں دوطرفہ تجارت اور سرمایہ کاری کے فروغ کے علاوہ ڈیجیٹل معیشت، مالیاتی ٹیکنالوجی (فن ٹیک)، بنیادی ڈھانچے کی ترقی، لاجسٹکس، چھوٹے اور درمیانے درجے کے کاروباری اداروں اور خدمات کے شعبے میں تعاون بڑھانے کے امکانات کا جائزہ لیا گیا۔
وزیراعظم شہباز شریف نے سنگاپور کے ساتھ پاکستان کے دیرینہ دوستانہ تعلقات کو مزید مضبوط بنانے کے عزم کا اعادہ کرتے ہوئے کہا کہ دونوں ممالک رواں سال سفارتی تعلقات کے قیام کی 60ویں سالگرہ منا رہے ہیں، جو دوطرفہ روابط کی تاریخی اہمیت کا مظہر ہے۔
وزیراعظم نے سنگاپور کی معاشی تبدیلی، جدت طرازی اور ترقی کے میدان میں کامیابیوں کو سراہتے ہوئے کہا کہ پاکستان سنگاپور کے ساتھ شراکت داری کو نہ صرف دوطرفہ سطح پر بلکہ جنوب مشرقی ایشیائی ممالک کی تنظیم (آسیان) کے ذریعے بھی خصوصی اہمیت دیتا ہے۔
مزید پڑھیں:پاکستان اور سنگاپور کے سفارتی تعلقات کے 60 سال، قوالی کی دلکش محفل کا انعقاد
دونوں رہنماؤں نے باہمی فائدے کے حامل اقتصادی تعاون کے نئے راستے تلاش کرنے، عوامی سطح پر روابط بڑھانے اور علاقائی و عالمی صورتحال پر بھی تبادلہ خیال کیا۔
اس موقع پر دونوں ممالک نے دوطرفہ اور کثیرالجہتی فورمز پر مسلسل رابطوں اور تعاون جاری رکھنے کے عزم کا اعادہ کیا۔
اسحاق ڈار کا اقتصادی تعلقات کی حقیقی صلاحیت بروئے کار لانے پر زور
اس سے قبل نائب وزیراعظم اور وزیر خارجہ اسحاق ڈار سے سنگاپور کے وزیر خارجہ ڈاکٹر ویویان بالاکرشنن نے ملاقات کی، جس میں دونوں ممالک کے دیرینہ تعلقات کا جائزہ لینے کے ساتھ تجارت، سرمایہ کاری، علاقائی روابط اور فنی مہارتوں کی ترقی کے شعبوں میں تعاون بڑھانے پر گفتگو ہوئی۔
Deputy Prime Minister/Foreign Minister Senator Mohammad Ishaq Dar @MIshaqDar50 and Singapore’s Minister for Foreign Affairs Dr. Vivian Balakrishnan addressed a Joint Press Stakeout at the Ministry of Foreign Affairs, Islamabad. https://t.co/liOQ1G7N6i
— Ministry of Foreign Affairs – Pakistan (@ForeignOfficePk) October 30, 2026
اسحاق ڈار نے کہا کہ پاکستان اور سنگاپور کے درمیان سفارتی تعلقات کی گہرائی اور مضبوطی ان کے اقتصادی تعلقات میں پوری طرح منعکس نہیں ہوتی، اس لیے دونوں ممالک کے درمیان تجارت اور سرمایہ کاری کے وسیع امکانات سے بھرپور فائدہ اٹھانے کی ضرورت ہے۔
انہوں نے اس اعتماد کا اظہار کیا کہ دونوں حکومتوں کے درمیان قریبی رابطہ کاری، بالخصوص کاروباری طبقے اور سرمایہ کاروں کو سہولتیں فراہم کرنے کے اقدامات سے اقتصادی تعلقات کو نئی بلندیوں تک پہنچایا جا سکتا ہے۔
ایس آئی ایف سی کے کردار اور سرمایہ کاروں کو سہولتوں پر تبادلہ خیال
نائب وزیراعظم نے خصوصی سرمایہ کاری سہولت کونسل (ایس آئی ایف سی) کے کردار کو بھی اجاگر کیا اور بتایا کہ اس کے امور بورڈ آف انویسٹمنٹ میں ضم کر دیے گئے ہیں، تاکہ سرمایہ کاروں کو ایک ہی مقام پر سہولتیں فراہم کرنے کے لیے مؤثر اور آسان نظام مہیا کیا جا سکے۔
اسحاق ڈار نے پاکستان میں استعداد کار بڑھانے کے لیے سنگاپور کے تعاون کو سراہتے ہوئے بتایا کہ تقریباً 1,500 پاکستانی سرکاری افسران سنگاپور کی جانب سے فراہم کردہ تربیتی سہولتوں اور پروگراموں سے استفادہ کر چکے ہیں۔
یہ بھی پڑھیں:اقوام متحدہ اجلاس: وزیراعظم کی بھرپور سفارتی سرگرمیاں، اسحاق ڈار نے تفصیلات بتا دیں
انہوں نے فنی مہارتوں کے فروغ کے لیے سنگاپور کے انسٹی ٹیوٹ آف ٹیکنیکل ایجوکیشن اور پاکستان کے نیشنل ووکیشنل اینڈ ٹیکنیکل ٹریننگ کمیشن (نیوٹیک) کے درمیان تعاون کے انتظامات کو جلد حتمی شکل دینے پر بھی زور دیا۔
2027 میں سنگاپور کی آسیان سربراہی، پاکستان کے لیے تعاون کے نئے امکانات
ملاقات میں کثیرالجہتی فورمز پر باہمی تعاون اور آسیان کے ساتھ پاکستان کے بڑھتے ہوئے روابط پر بھی گفتگو ہوئی، بالخصوص 2027 میں سنگاپور کی آسیان کی سربراہی کے تناظر میں تعاون کے امکانات کا جائزہ لیا گیا۔
اسحاق ڈار اور ڈاکٹر ویویان بالاکرشنن نے علاقائی اور عالمی پیش رفت پر بھی اپنے خیالات کا تبادلہ کیا۔
نائب وزیراعظم نے تنازعات کے حل اور پائیدار امن و استحکام کے فروغ کے لیے مذاکرات اور سفارت کاری کو بنیادی ذریعہ قرار دیا۔
فلسطین، جموں کشمیر اور عالمی عدالت انصاف کے معاملات پر تبادلہ خیال
دونوں ممالک کے اعلیٰ حکام کے درمیان ملاقاتوں کے دوران فلسطین، جموں کشمیر اور عالمی عدالت انصاف (آئی سی جے) سے متعلق امور پر بھی تبادلہ خیال کیا گیا۔
ان معاملات پر گفتگو کے ساتھ علاقائی و عالمی امن، استحکام اور تنازعات کے سفارتی حل کی اہمیت بھی اجاگر کی گئی۔
پاکستان اور سنگاپور کے درمیان براہِ راست پروازوں کی بحالی پر غور
اسحاق ڈار نے بتایا کہ پاکستان اور سنگاپور کے درمیان براہِ راست پروازوں کی ممکنہ بحالی کے معاملے پر بھی بات چیت ہوئی ہے۔
مزید پڑھیں:بھارت نے پاکستان میں ہونے والے 2027 سیف گیمز میں شرکت پر رضامندی دے دی
براہِ راست فضائی رابطوں کی بحالی سے دونوں ممالک کے درمیان کاروباری سفر، سرمایہ کاری اور عوامی سطح پر روابط کو فروغ دینے میں مدد ملنے کی توقع ہے۔
پاکستان اور سنگاپور کے درمیان سفارتی تعلقات کے قیام کے 60 سال مکمل ہونے کے موقع پر اعلیٰ سطح کی یہ ملاقاتیں دونوں ممالک کے دیرینہ تعلقات کو اقتصادی تعاون، سرمایہ کاری، ادارہ جاتی روابط اور علاقائی شراکت داری کی نئی جہتوں سے ہم آہنگ کرنے کی مشترکہ کوششوں کی عکاس ہیں۔
