اسلام آباد کا کشمیر چوک انڈر پاس ریکارڈ مدت میں مکمل کرلیا گیا، وزیراعظم شہباز شریف نے منصوبے کا افتتاح کردیا۔ انڈر پاس کی تعمیر صرف 27 دن میں مکمل ہوئی، جس پر وزیراعظم نے منصوبے کی برق رفتار تکمیل کو سراہتے ہوئے کہا کہ انہوں نے کسی منصوبے میں اتنی تیزی نہیں دیکھی۔
یہ بھی پڑھیں: اسلام آباد: راول ڈیم چوک سے کشمیر چوک سڑک کی بندش، متبادل ٹریفک پلان جاری
1.4 ارب روپے کی لاگت سے مکمل ہونے والے منصوبے میں 4 نئی رابطہ سڑکیں بھی شامل ہیں، جبکہ اطراف میں 6 ہزار نئے درخت اور پودے لگائے گئے ہیں۔ منصوبے کا مقصد کشمیر چوک پر ٹریفک کا دباؤ کم کرنا اور اسلام آباد، راولپنڈی کے درمیان آمدورفت کو آسان بنانا ہے۔
تقریب سے خطاب کرتے ہوئے وزیراعظم شہبازشریف نے کہا کہ یہ منصوبہ محض انڈر پاس نہیں بلکہ 4کلومیٹر سڑکوں کا نیٹ ورک ہے، منصوبے کے ساتھ کشمیر کی مناسبت سے 2مونومنٹس بھی تعمیر کیے گئے ہیں۔
وزیر اعظم محمد شہباز شریف کی اسلام آباد میں کشمیر چوک انڈر پاس کی افتتاحی تقریب میں شرکت اور خطاب https://t.co/uLgBTZfWT1
— PMLN (@pmln_org) November 5, 2026
انہوں نے کہا کہ اس انڈرپاس کی بروقت تکمیل پر وزیرداخلہ محسن نقوی اور سی ڈی اے کی ٹیم مبارکباد کی مستحق ہے، آئندہ سال ایس سی او کانفرنس کے انعقاد کے پیش نظر اسلام آباد کو خوبصورت بنانے کی کوششیں جاری ہیں، شہر کی خوبصورتی اور ٹریفک کے نظام کو بہتر بنانا ہماری ذمہ داری ہے۔
ان کا کہنا تھا کہ کشمیر انڈرپاس کی تکمیل ایس سی او کانفرنس اور دیگر اہم یونٹس کے لیے ہماری تیاریوں کا عملی ثبوت ہے، یہ منصوبہ ایک ارب 45کروڑ کی لاگت سے مکمل کیا گیا ہے،منصوبہ تخمینہ لاگت سے تقریباً ڈھائی فیصد کم قیمت پر ای پیڈز کے ذریعے ٹھیکے پر دیا گیا۔
یہ بھی پڑھیں: کھنہ پل پر تعمیراتی کام، اسلام آباد ٹریفک پولیس نے ڈائیورژن پلان جاری کردیا
یاد رہے کہ کشمیر انڈر پاس کی تعمیر سے اسلام آباد، راولپنڈی، مری اور کشمیر کے درمیان ٹریفک کی روانی آسان ہوگی، منصوبے میں تقریباً 4کلومیٹر سڑکوں کا نیٹ ورک بھی شامل ہے، انڈر پاس سے مصروف شاہراؤں پر ٹریفک کا دباؤ کم ہوگا۔
اس منصوبے کے تحت 6ہزار 340نئے درخت بھی لگائے گئے ہیں، منصوبے کے اطراف کشمیر کی مناسبت سے 2خوبصورت مونومنٹس بھی تعمیر کیے گئے ہیں۔
