ورلڈ کپ کوالیفائر سپر 6 میں اسکاٹ لینڈ نے ویسٹ انڈیز کو 7 وکٹوں سے شکست دے دی جس کے ساتھ ہی ویسٹ انڈیز ورلڈ کپ کی دوڑ سے باہر ہوگئی۔ ورلڈ کپ کوالیفائرز میں ویسٹ انڈیز کی مسلسل تیسری شکست تھی جس کے بعد پہلے 2 ورلڈ کپ کی فاتح ٹیم پہلی مرتبہ ورلڈ کپ کے لیے کوالیفائی کرنے میں ناکام ہوگئی ہے۔
آئی سی سی ورلڈ کپ کوالیفائرز کے گروپ میچز میں زمبابوے اور نیدرلینڈز کے ہاتھوں شکست کے بعد ویسٹ انڈیز کی ٹیم گزشہ روز سپر 6 مرحلے کے اہم میچ میں اسکاٹ لینڈ سے بھی ہار گئی۔ ہرارے میں کھیلے گئے ورلڈ کپ کوالیفائر سپر 6 میں اسکاٹ لینڈ نے ٹاس جیت کر ویسٹ انڈیز کو بیٹنگ کی دعوت دی۔ ویسٹ انڈیز کی ٹیم 181 رنز پر ڈھیر ہوگئی، جیسن ہولڈر 45 رنز بناکر ٹاپ اسکورر رہے، روماریو شیفرڈ نے 36 رنز بنائے۔ اسکاٹ لینڈ کے برینڈن مکمولن نے 3 کھلاڑیوں کو آؤٹ کیا۔
ویسٹ انڈیز کے 182 رنز کا ہدف اسکاٹ لینڈ نے 44 ویں اوورز میں 3 وکٹوں کے نقصان پر بآسانی حاصل کرلیا اور 7 وکٹوں سے شکست دی۔ اسکاٹ لینڈ کے میتھیو کراس نے 74 رنز کی نا قابل شکست اننگز کھیلی جبکہ برینڈن میکمولن نے 69 رنز بنائے۔ شکست کے ساتھ ہی 2 مرتبہ کا عالمی چیمپئن ویسٹ انڈیز پہلی بار ورلڈ کپ کے لیے کوالیفائی نہ کر سکا۔ بھارت میں ہونے والا کرکٹ ورلڈ کپ 2023 ویسٹ انڈیز کے بغیر ہونے والا پہلا ورلڈ کپ ہوگا۔
ورلڈ کپ کا آغاز 5 اکتوبر کو بھارت میں ہوگا اور 19 نومبر تک جاری رہے گا جہاں 8 ٹیمیں براہ راست کوالیفائی کرچکی ہیں اور 2 ٹیمیں کوالیفائر سے عالمی کپ کا حصہ ہوں گی۔ اس وقت کوالیفائر راؤنڈ میں زمبابوے اور سری لنکا کی ٹیمیں سرفہرست ہیں اور بہترین کھیل کا مظاہرہ کر رہی ہیں۔
