وزیراعظم پاکستان شہباز شریف کی زیر صدارت اجلاس میں 7 جولائی کو یوم تقدس قرآن منانے کا فیصلہ کیا گیا ہے۔
میڈیا رپورٹس کے مطابق وزیراعظم شہباز شریف کی زیر صدارت اجلاس میں سویڈن میں قرآن پاک کی بے حرمتی کے معاملے پر غور کیا گیا۔
مزید پڑھیں
وزیراعظم شہباز شریف کی زیر صدارت اجلاس میں 6 جولائی بروز جمعرات کو پارلیمنٹ کا مشترکہ اجلاس بلانے کا بھی فیصلہ کیا گیا ہے جس میں سویڈن واقعہ کے خلاف لائحہ عمل مرتب کیا جائے گا۔
اجلاس میں فیصلہ کیا گیا کہ جمعہ 7 جولائی کو سویڈن واقعے کے خلاف ملک گیر احتجاج ہوگا۔ وزیراعظم شہبازشریف نے تمام جماعتوں سمیت پوری قوم کو احتجاج میں شریک ہونے کی اپیل کی ہے۔
اجلاس میں گفتگو کرتے ہوئے وزیراعظم شہباز شریف نے کہا کہ 7 جولائی کو ہونے والے احتجاج میں تمام سیاسی جماعتوں سمیت قوم بھرپور شرکت کرے گی اور شیطانی ذہنوں کو ایک پیغام دیا جائے گا۔
وزیراعظم شہباز شریف نے ہدایت کی کہ پارلیمنٹ کے مشترکہ اجلاس میں سویڈن واقعہ کے خلاف قرار داد منظور کی جائے ۔
انہوں نے کہا کہ قرآن کریم کی عزت و حرمت کے لیے ہم سب ایک ہیں۔ یہ ہمارے ایمان کا حصہ ہے۔ مذہب، مقدس ہستیوں اور عقائد کو نشانہ بنانے والے عالمی امن کے لیے خطرہ ہیں۔ امن پسند، بقائے باہمی پر یقین رکھنے والی اقوام متشدد قوتوں کا راستہ روکیں۔
شہباز شریف نے کہا کہ گمراہ ذہن اسلاموفوبیا کے منفی رجحان کو پھیلاکر مذموم ایجنڈے پر عمل پیرا ہیں۔ عالمی سطح پر پرامن، متوازن اور بین المذاہب ہم آہنگی پر یقین رکھنے والی قوتیں مل کر ایسے رجحانات اور واقعات کے تدارک کے لیے کام کریں۔
وزیراعظم شہباز شریف نے کہا کہ ملک بھر میں سویڈن واقعہ کے خلاف ریلیاں نکالی جائیں۔ انہوں نے بطور صدر پاکستان مسلم لیگ ن بھی ملک بھر میں ریلیاں نکالنے کی ہدایت کی ہے۔
