وزیراعلیٰ بلوچستان عبدالقدوس بزنجو نے کہا ہے کہ موجودہ حکومتیں اپنی مدت پوری کرنے کی جانب بڑھ رہی ہیں۔ کوشش ہے کہ سرکاری امور کی انجام دہی میں مزید تیزی لائی جائے۔
پیر کو سیکریٹریز کے اجلاس سے خطاب کرتے ہوئے انہوں نے کہا کہ ہمارا کام پالیسی دینا جبکہ ان پر عملدرآمد کرنا سیکریٹریز کی ذمہ داری ہے۔ کبھی بھی کسی سیکریٹری کو قواعد و ضوابط سے ہٹ کر ڈائریکشن نہیں دی۔
عبدالقدوس بزنجو نے کہا کہ وزیراعلیٰ سیکریٹریٹ کی جانب سے کبھی بھی سیکریٹریز پر نہ تو دباؤ ڈالا گیا اور نہ ہی محکموں میں مداخلت کی گئی۔ ہمیشہ افسران کو عزت دی اور ان کی عزت نفس کا احترام کیا۔ میری نیت شروع دن سے صوبے اور عوام کی بھلائی ہے۔
وزیراعلیٰ نے کہا کہ صوبائی وزرا نے اپنے محکموں کے سیکریٹریز پر اعتماد کر کے انہیں محکمانہ ذمہ داریا ں سونپیں۔ سیکریٹریز میری ٹیم کا مضبوط حصہ رہے اور ان کے ساتھ ٹیم لیڈر کی حیثیت سے کام کرنا خوشگوار تجربہ رہا۔ روزگار کی فراہمی ہماری حکومت کی اولین ترجیح ہے۔
انہوں نے کہا کہ میر ٹ اور شفافیت کے لیے پبلک سروس کمیشن کے ذریعہ بھرتیوں کا مشکل فیصلہ کیا۔ یقین ہے کہ نوجوانوں کو روزگار فراہم کر کے ان کی صلاحیتیں ملک اور صوبے کی ترقی کے لیے بروئے کار لائی جاسکتی ہیں۔
ان کا کہنا تھا کہ تمام محکمے اپنی خالی آسامیوں پر بھرتی کا عمل جلد مکمل کریں۔ کسی اہل نوجوان کو باعزت روزگار کی فراہمی کار خیر ہے۔
اجلاس میں سیکریٹریز کی جانب سے رہنمائی اور سرپرستی کی فراہمی پر وزیراعلیٰ کی قائدانہ صلاحیتوں کو خراج تحسین پیش کیا گیا۔
سیکریٹریز کی جانب سے وزیراعلیٰ کو خالی آسامیوں پر بھرتی کے عمل کے حوالے سے بریفنگ دی گئی اور بتایا گیا کہ بھرتی کے جاری عمل کو رواں ماہ کے اختتام تک مکمل کر لیا جائے گا۔
اس موقع پر وزیراعلیٰ نے کہا کہ بھرتی کے عمل میں میرٹ اور شفافیت کو ہر صورت یقینی بنایا جائے۔
