کراچی کے علاقے گلستان جوہر میں لڑکی کر ہراساں کرنے والے ملزم کی تلاش پولیس کے لیے معمہ بن گئی ہے۔ پولیس کی جانب سے سی سی ٹی وی فوٹیج اور ملزم کے تیار کیے گئے خاکے کو ملانے کی کوشش کی جا رہی ہیں۔
یہ بھی پڑھیں کراچی: گلستان جوہر میں لڑکی کو ہراساں کرنےکا مقدمہ درج کر لیا گیا
میڈیا رپورٹس کے مطابق لڑکی کو ہراساں کرنے کے شک میں حراست میں لیے گئے 30 سے زائد افراد سے تفتیش ناکام ہو گئی ہے۔ جن لوگوں کو پکڑا گیا ہے ان میں سے کوئی سی سی ٹی وی فوٹیج سے مشابہت رکھتا ہے اور کوئی خاکے سے ملتا جلتا ہے۔
اس کے علاوہ پولیس کی جانب سے تحویل میں لی گئی موٹرسائیکل کا رنگ بھی میچ نہیں کر رہا۔
پولیس نے ملزم کی تلاش کے لیے دیگر اداروں سے بھی مدد لینے کا فیصلہ کیا ہے۔ اس کے علاوہ ڈالمیا، شانتی نگر، پہلوان گوٹھ میں پولیس نے چھاپے بھی مارے ہیں۔
یہ بھی پڑھیں اسلام آباد و کراچی میں خواتین سے نازیبا حرکات، ملزمان تاحال گرفت سے باہر
واضح رہے کہ گزشتہ دنوں شہر قائد کے علاقے گلستان جوہر میں ایک گلی سے گزرتے وقت لڑکی پر ایک شخص نے جنسی حملہ کیا تھا جس کی سی سی ٹی وی ویڈیو بھی سامنے آ گئی تھی۔
ملزم نے ماسک پہنا ہوا تھا اور گلی سے گزرتی ہوئی لڑکی پر جھپٹنے کی کوشش کی مگر مزاحمت کے باعث وہ پیچھے ہٹنے کے بعد فرار ہو گیا تھا۔
