وزیر اعظم شہباز شریف سے سابق صدر آصف علی زرداری اور پاکستان پیپلز پارٹی کے چیئرمین اور وفاقی وزیر خارجہ بلاول بھٹو زرداری نے وزیر اعظم ہاؤس میں اہم ملاقات کی ہے۔
وزیر اعظم شہباز شریف نے دونوں راہنماؤں کا استقبال کیا۔
ملاقات میں ملک کی مجموعی سیاسی صورتحال پر تفصیلی مشاورت ہوئی۔
ملاقات میں وفاقی وزیر خزانہ محمد اسحاق ڈار اور وفاقی وزیر برائے اقتصادی امور سردار ایاز صادق بھی موجود تھے۔
ملاقات میں قومی اسمبلی کی تحلیل اور نگران سیٹ اپ کے موضوعات پر تبادلہ خیال ہوا۔ واضح رہے کہ گزشتہ روز بعض میڈیا رپورٹس میں بتایا جا رہا تھا کہ مسلم لیگ (ن) اور پیپلز پارٹی نے قومی اسمبلی کی مدت پوری ہونے سے قبل 8 اگست کو توڑنے پر اتفاق کرلیا ہے۔ ان رپورٹس میں ذرائع کے حوالے سے دعویٰ کیا گیا تھا کہ قومی اسمبلی توڑنےکے لیے 9 اور 10 اگست پر بھی غور کیا گیا تھا۔
بعدازاں وفاقی وزیراطلاعات و نشریات مریم اورنگزیب نے ان خبروں کو غلط قرار دیتے ہوئے کہا تھا کہ قومی اسمبلی کی تحلیل کی تاریخ پر ابھی فیصلہ نہیں ہوا۔ انہوں نے کہا کہ پاکستان ڈیموکریٹک موومنٹ (پی ڈی ایم) اور اتحادی جماعتوں کی مشاورت سے تاریخ کا فیصلہ ہوگا۔ ان کا کہنا تھاکہ قومی اسمبلی کی تحلیل کی تاریخ کے فیصلے کا باضابطہ اعلان کیا جائے گا۔
واضح رہے کہ قومی اسمبلی کی مدت 12 اگست رات 12 بجے تک ہے، اسمبلی مدت سے قبل تحلیل ہونے پر عام انتخابات کرانے کے لیے نگران سیٹ اپ 90 دن کے لیے آئےگا۔
13 جولائی کو قوم سے خطاب میں وزیراعظم شہباز شریف نے اگست 2023 میں معاملات نگران حکومت کے حوالے کرنےکا اعلان کیا تھا۔
