نارتھ کراچی میں پولیس نے ایک مقابلے میں 5 ڈاکو ہلاک کردیے ہیں، جن میں سے 3 کی شناخت ہو گئی ہے۔
ایس ایس پی سینٹرل معروف عثمان کے مطابق نارتھ کراچی میں پولیس مقابلے میں ہلاک ہونے والے 5 ڈاکوؤں میں سے 3 کی شناخت پائندہ خان، عبداللہ اور عمران کے نام سے ہوئی ہے۔
پائندہ خان اور عبداللہ کی سابق مجرمانہ سرگرمیوں کا ریکارڈ بھی مل گیا ہے، دونوں ڈاکوؤں کے خلاف مختلف تھانوں میں مقدمات درج ہیں، تیسرے ڈاکو عمران کا تاحال’ کوئی کرمنل ریکارڈ نہیں ملا ہے۔ ہلاک ہونے والے باقی 2 ڈاکوؤں کی شناخت نہیں ہو سکی ہے۔
ایس ایس پی معروف عثمان کے مطابق ملزمان سفید گاڑی میں آئے تھے، پولیس مقابلے کے دوران ملزمان کے 2 ساتھی گاڑی لے کر فرار ہو گئے، گاڑی کے حوالے سے تفصیلات حاصل کی جا رہی ہیں۔
مزید پڑھیں
’ ڈاکوؤں کا گروہ گھر میں لوٹ مار کے لیے داخل ہوا تھا، پولیس کے پہنچنے پر ڈاکوؤں اور پولیس کا مقابلہ ہوا۔‘
ڈکیتی سے متاثرہ شہری نے بتایا کہ 5 ڈکیت ان کے گھر لوہے کی جالیاں کاٹ کر گھر میں داخل ہوئے، ملزمان نے ان کے بھائی کے کمرے کا دروازہ توڑا اور ہاتھ پاؤں باندھ کر بھابھی کو اوپر لے گئے۔
’ملزمان نے ٹی وی لاؤنچ کا دروازہ توڑا اور وہاں بھی لوٹ مار کی، ملزمان ٹی وی لاؤنج پر آئے تو شور شرابا ہوا جس پر ملزمان نے ان پر اور ان کے بھتیجوں پر تشدد کیا اور ان کے والدین کو کمرے میں بند کر دیا۔‘
’شور کی سن کر پڑوسیوں نے 15 پر پولیس کو اطلاع دی۔ ’ملزمان نے تمام قیمتی سامان لوٹ کر جمع کر لیا تھا کہ اتنے میں پولیس پہنچ گئی، ملزمان نے نقدی، زیورات، لیپ ٹاپس اور دیگر سامان لوٹا، جس میں سے کچھ واپس مل گیا ہے اور کچھ غائب ہے۔‘
پولیس ذرائع کے مطابق 1 ڈاکو6 گھنٹے تک پانی کے ٹینک میں چھپا رہا اور اب فرار ہو گیا ہے۔
علاقہ مکینوں نے پولیس کو بتایا کہ فرار ڈاکو پانی میں بھیگا ہوا تھا۔
علاقہ مکینوں کی اطلاع پر پولیس نے دوبارہ اضافی نفری طلب کر کے ملزم کی تلاش شروع کر دی ہے۔
