پاکستان کرکٹ ٹیم کے اوپننگ بلے باز امام الحق نے گزشتہ روز ویڈیو اسٹریمنگ پلیٹ فارم یوٹیوب کی ایک پوڈ کاسٹ میں گفتگو کرتے ہوئے کہا کہ ان کے والدین کبھی ان کا میچ اسٹیڈیم میں دیکھنے نہیں آئے۔
قومی اوپننگ بلے بازامام الحق نے اپنے میچوں کے دوران والدین کی اسٹیڈیم سے غیر حاضری کی وجوہات بیان کرتے ہوئے کہا کہ انہیں اپنی خراب کارکردگی کا خوف نہیں ہے بلکہ اسٹیڈیم میں بیٹھے تماشائیوں کا ہے کہ کہیں وہ میرے والدین کے سامنے مجھے پرچی نہ کہہ دیں۔
’۔۔۔ کیونکہ اگر ایسا ہوا تو مجھے بہت افسوس ہوگا، اسی وجہ سے آج تک والدین کو گراؤنڈ میچ دکھانے نہیں لایا۔‘
انہوں نے مزید کہا کہ وہ چاہے جتنا اچھا پرفارم کرلیں لیکن اگر وہ جلدی آؤٹ ہوجائیں تو لوگ پچھلی ساری اچھی پرفارمنس بھول کر پرچی کے نعرے لگاتے ہیں اور وہ نہیں چاہتے کہ ان کی والدہ ایسے نعرے سنیں۔
امام الحق کے پوڈ کاسٹ کی کچھ کلپس سماجی رابطوں کی ویب سائٹس پر وائرل ہوئیں تو جہاں صارفین نے امام الحق کو اس قسم کے نعروں پر دھیان نہ دینے کا مشورہ دیا وہی سابق ہیڈ کوچ ثقلین مشتاق نے بھی امام الحق کے حق میں پوسٹ کر ڈالی۔
ثقلین مشتاق نے سماجی رابطے کی ویب سائٹ ایکس پر لکھا کہ ون ڈے رینکنگ میں چوتھی پوزیشن بہت بڑی کامیابی ہے۔ ’قوم کو آپ پر فخر ہے ‘اور مجھے یقین ہے کہ آپ کے والدین کو بھی آپ پر فخر ہوگا اور آپ کو براہ راست کھیلتے ہوئے دیکھنا ان کے لیے ایک پر مسرت موقع ہوگا۔
Dear @ImamUlHaq12 your position 4th in the ODI ranking such a great achievement. Nation is proud of you & I am sure your parents must be the proudest with your dedication and hard work and overcoming challenges I believe it would be a delight for them to see you play live pic.twitter.com/1jORbS5VN0
— Saqlain Mushtaq (@Saqlain_Mushtaq) August 21, 2023
واضح رہے کہ امام الحق پاکستان کرکٹ ٹیم کے سابق کپتان اور چیف سیلکٹر انضمام الحق کے بھتیجے ہیں۔ اپنے کریئرکےآغازمیں ان پر اپنے چچا کی وجہ سے ’پرچی‘ کی چھاپ لگ گئی تھی اور ان کو عوام کی جانب سے شدید تنقید کا سامنا کرنا پڑا۔
