چیئرمین پی ٹی آئی کی گرفتاری کے بعد ہنگامہ آرائی سے متعلق کیس کی سماعت کے دوران انسداد دہشت گردی کراچی کی عدالت نے رہنما تحریک انصاف راجہ اظہر کو 2 دن کے جسمانی ریمانڈ پر پولیس کے حوالے کردیا۔
عدالتی استفسار پر راجہ اظہر نے بتایا کہ پولیس نے انہیں کسی قسم کے تشدد کا نشانہ نہیں بنایا۔
پولیس نے عدالت میں موقف اپنایا کہ ملزم کو ٹیپو سلطان تھانے میں درج مقدمے میں گرفتار کیا گیا ہے، ملزم اپنے ساتھیوں کے ہمراہ شارع فیصل پر ہنگامہ آرائی اور جلاؤ گھیراؤ میں ملوث ہے، مزید تفتیش کے لیے 14 دن کا ریمانڈ دیا جائے۔
عدالت نے راجہ اظہر کا 2 روزہ جسمانی ریمانڈ منظور کرتے ہوئے پولیس سے کیس سے متعلق پیش رفت رپورٹ طلب کرلی۔
سماعت کے بعد میڈیا سےغیررسمی گفتگومیں راجہ اظہرکا کہنا تھا کہ عمران خان کی محبت دل سے کوئی نہیں نکال سکتا۔ اعتراف کرتا ہوں کہ 9 مئی کو احتجاج کیا تھا۔
’جہاں عمران خان کھڑا ہے وہاں میں کھڑا ہوں، شرجیل انعام میمن کو چیلنج کرتا ہوں کہ ثابت کرے بس پر آگ لگی، یہاں شراب کو شہد بنا دیا جاتا ہے۔‘
راجہ اظہر کا مزید کہنا تھا کہ ان پر کسی قسم کا دباؤ نہیں ڈالا جارہا، اللہ تعالیٰ بہتر کرے گا، یہ ایمان ہے جو بھی ہوگا بہتر ہوگا۔
’عمران اسماعیل اور اکرم چیمہ نے اپنا جواب خود دیا، انسان کا ایمان مضبوط ہونا چاہیے، کوئی ایسی بات نہیں ہے اور مجھ پر کوئی پریشر نہیں ہے۔‘
