پشاور میں بین الاقوامی سطح پر آئس سپلائی کرنے والی فیکٹری پکڑی گئی ہے جسے پولیس نے سیل کر دیا ہے۔
پولیس کے مطابق آئی جی خیبرپختونخوا اختر حیات کی ہدایات پر منشیات کے خلاف مہم جاری ہے، اور حالیہ کارروائی خفیہ اطلاعات بنیاد پر عمل میں لائی گئی ہے۔
پولیس حکام نے بتایا ہے کہ ڈی ایس پی سبرب مختیار علی اور ایس ایچ او تھانہ بھانہ ماڑی مدثر حیات نے لیڈیز پولیس کے ہمراہ کارروائی کرتے ہوئے خطرناک نشہ آئس سپلائی کرنے والے نیٹ ورک کا سراغ لگا کر فیکٹری کو سیل کر دیا، اور اس دوران 2 ملزمان کو گرفتار کیا گیا ہے۔
مزید پڑھیں
’گرفتار ملزمان میں نور خان اور تاج محمد شامل ہیں، جن میں سے ایک کا تعلق ہمسایہ ملک افغانستان سے ہے، جبکہ دوسرا لنڈی کوتل کا رہائشی ہے‘۔
ایس پی سٹی ڈویژن عبد السلام خالد نے بتایا کہ گھناؤنا دھندا کرنے والے نیٹ ورک نے مذموم مقاصد کی تکمیل کے لیے علاقہ منکراہ میں کرائے پر مکان حاصل کیا تھا۔
انہوں نے کہاکہ گرفتار ملزمان نے ابتدائی تفتیش کے دوران منشیات کے مکروہ دھندے کا اعتراف کرتے ہوئے نیٹ ورک کے دیگر ملزمان کی بھی نشاندہی کی ہے، ملزمان نے فیکٹری میں منشیات تیار کرنے کے بعد مختلف شہروں میں اسمگل کرنے کا بھی انکشاف کیا ہے۔
عبدالسلام خالد نے بتایا کہ کارروائی کے دوران فیکٹری سے 58 کلو گرام سے زیادہ آئس، نشہ تیار کرنے میں استعمال ہونے والی سیلنگ مشین، ڈیجیٹل اسکیل، ڈرم، پلاسٹک بیگز اور دیگر مختلف اوزار بھی برآمد کیے گئے ہیں۔
انہوں نے مزید بتایا کہ منشیات کے دھندے میں ملوث ملزمان کے خلاف تھانہ بھانہ ماڑی میں مقدمہ درج کر کے جامع تحقیقات کا آغاز کردیا ہے۔
