رہنما پاکستان تحریک انصاف (پی ٹی آئی) حماد اظہر کا کہنا ہے کہ عالمی بینک نے خبردار کیا ہے کہ پاکستان کی معیشت تباہی کے دہانے پر ہے، اب وقت آگیا ہے کہ پاکستان سیکیورٹی اسٹیٹ کے پیٹرن سے ہٹ جائے۔
سیکرٹری جنرل وسطی پنجاب پاکستان تحریک انصاف حماد اظہر نے عالمی بینک کی پاکستان کی معیشت کے حوالے سے جاری کردہ رپورٹ پر رد عمل دیتے ہوئے کہاکہ مضبوط جمہوری مینڈیٹ کے ساتھ ایک مستحکم منتخب حکومت کو اصلاحات پرعمل درآمد شروع کرنے کی ضرورت ہے۔
انہوں نےکہاکہ یہ وقت مطلق العنان حکمرانی کے تجربات اور شارٹ کٹ کے خوابوں میں ضائع کرنے کا نہیں ہے۔
مزید پڑھیں
واضح رہے کہ گزشتہ روز عالمی بینک نے ایک رپورٹ جاری کی ہے جس میں پاکستان میں معاشی اصلاحات کا نیا پروگرام شروع کرنے کا منصوبہ دیا گیا ہے۔
نئے پروگرام کے تحت سماجی تحفظ کے پروگرام کا جائزہ لیا جائے گا، کم عمر بچوں اور بچیوں میں غذائی قلت کے مسئلے پر بحث کی جائے گی۔
عالمی بینک کی رپورٹ کے مطابق پاکستان کو مہنگائی سمیت دیگر معاشی چیلنجز کا سامنا ہے، بجلی کی بڑھتی قیمتیں، موسمیاتی تبدیلی، ناکافی مالی وسائل کے بڑے چیلنجز درپیش ہیں۔
رپورٹ میں موسمیاتی تبدیلی کے اثرات سے نمٹنے کے لیے فنڈز کی قلت کی نشاندہی کی گئی ہے، عالمی بینک نے مسائل کے حل کے لیے ترجیحات اور فیصلہ سازی کے لیے اتفاق رائے پر زور دیا ہے۔
رپورٹ کے مطابق روشن مستقبل کے لیے مختلف شراکت داروں کے ساتھ مشاورتی عمل شروع کیا گیا ہے۔ عالمی بینک نے مزید کہا کہ توانائی، زراعت اور سرکاری اداروں کی بہتری کے امور پر بھی غور کیا جائے گا۔
اس پروگرام کا مقصد بڑے پیمانے پراسٹیک ہولڈرز کے ساتھ بات چیت شروع کرنا ہے تاکہ اس بات کا تعین کیا جا سکے کہ ملکی معیشت کو مضبوط، موسمیاتی تبدیلیوں کے پیش نظر زیادہ لچکدار بنانے اور پائیدار ترقی کی طرف مستقل بنیادوں پر لے جانے کے لیے کن بنیادی پالیسیوں میں تبدیلیوں کی سب سے زیادہ ضرورت ہے۔
ورلڈ بینک نے امید ظاہر کی ہے کہ بات چیت کا یہ پروگرام جامع، پائیدار اور موسمیاتی تبدیلیوں سے ہم آہنگ ترقی کی جانب اتفاق رائے پیدا کرنے میں معاون ثابت ہو گا۔
روشن مستقبل کے لیے اصلاحات کا پروگرام ملک بھر میں آن لائن اور براہ راست پروگراموں کی صورت میں جاری رہے گا، اس سلسلے میں 2 روزہ مذاکرہ اسلام آباد میں منعقد کیا جا رہا ہے۔
