کرکٹ ورلڈ کپ: ’بابر اعظم اپنی کارکردگی سے آگ لگا سکتے ہیں‘

کرکٹ کے عالمی مقابلے کا آغاز 5 اکتوبر سے بھارت میں ہونے جا رہا ہے، اس ورلڈ کپ کی چمپیئن کون سی ٹیم ہو گی؟ کس ملک کا کون سا کھلاڑی اچھا پرفارم کرے گا؟ اس حوالے سے پیشن گوئیوں کا سلسلہ جاری ہے۔

بھارت کی کرکٹ ٹیم کے سابق کھلاڑی گوتم گھمبیر نے پاکستانی ٹیم کے کپتان بابر اعظم کو بہترین کوالٹی والا بیٹر قرار دے دیا ہے۔

سابق بھارتی کرکٹر گوتم گھمبیر نے حال ہی میں اسٹار اسپورٹس کو انٹرویو دیا ہے جہاں ان سے مختلف سوالات کیے گئے۔

ایک سوال کہ آئندہ کرکٹ ورلڈ کپ میں کون سا کھلاڑی بہترین کارکردگی کا مظاہرہ کر سکتا ہے؟ کے جواب میں گوتم گھمبیر نے کہاکہ بابر اعظم میں ایسی کوالٹی ہے کہ وہ اس ورلڈ کپ میں آگ لگا سکتے ہیں۔

میزبان کی جانب سے اس سوال میں آپشنز بھی رکھے گئے تھے جن ویرات کوہلی، روہت شرما، جو روٹ، کین ولیمسن، ڈیوڈ وارنر، اسٹیو اسمتھ اور بابر اعظم شامل تھے۔

انہوں نے کہا کہ بابر اعظم میں جو کوالٹی ہے وہ کسی اور میں نہیں۔

یاد رہے کہ ورلڈ کپ کے لیے قومی کرکٹ ٹیم کا اعلان کر دیا گیا ہے جس کی قیادت بابر اعظم کریں گے۔ اس کے علاوہ نسیم شاہ کی انجری کے باعث فاسٹ بولر حسن علی کو ٹیم کا حصہ بنایا گیا ہے۔