غیر قانونی طور پر بھارت کے زیر قبضہ جموں و کشمیر کے مختلف علاقوں میں چسپاں کیے گئے پوسٹرز میں عوام سے اپیل کی گئی ہے کہ وہ متحد ہو کربھارتی ریاستی دہشت گردی کے خلاف اپنی آواز بلند کریں تاکہ بھارت کو یہ واضح پیغام جائے کہ کشمیری عوام حق خودارادیت کے حصول کے لیے اپنی جدوجہد جاری رکھیں گے اوربھارت کے مذموم عزائم کو ناکام بنائیں گے۔
کشمیرمیڈیا سروس (کے ایم ایس) کے مطابق پوسٹرجموں و کشمیر پیپلز ریزسٹنس پارٹی، ریزسٹنس یوتھ فورم جموں و کشمیر، جموں و کشمیر ڈیموکریٹک موومنٹ، جموں و کشمیر پولیٹیکل ریزسٹنس موومنٹ، نوجوانانِ حریت جموں و کشمیر اوردیگر حریت پسند تنظیموں کی طرف سے سرینگر اور دیگر علاقوں میں دیواروں، ستونوں اور بجلی کے کھمبوں پر چسپاں کیے گئے ہیں۔
پوسٹرز میں لوگوں پر زور دیا گیا ہے کہ وہ اپنی صفوں میں اتحاد واتفاق پیدا کریں اور بھارتی حکومت کی ہندوتوا دہشت گردی کے خلاف اٹھ کھڑے ہوں۔
مزید پڑھیں
پوسٹرز میں یہ بھی کہا گیا ہے کہ بھارت کی ہندوتوا حکومت کشمیریوں کا قتل عام کر رہی ہے اور اس کی خفیہ ایجنسی ’را‘ نے دیگر ممالک میں سفارت کاروں کے بھیس میں دہشت گردی پھیلا رکھی ہے۔
پوسٹرز میں یہ بھی درج ہے کہ بھارت کے ہندوتوا حکمران اور ان کی فورسز کشمیریوں، بھارتی مسلمانوں، سکھوں، عیسائیوں، دلتوں اور دیگر اقلیتوں کے سیاسی حقوق سلب کرنے کے علاوہ ان کو قتل کر رہی ہیں۔ بھارتی فوج مقبوضہ جموں و کشمیر میں آزادی کی آوازوں کو دبانے کی کوشش کر رہی ہے۔
پوسٹرز میں کہا گیا ہے کہ بھارت میں اقلیتوں کے خلاف مودی حکومت کی ریاستی دہشت گردی کے بعد اب ہندوتوا نظریے کی حامل اس کی خفیہ ایجنسی ’را‘ آزاد کشمیر، پاکستان اور کینیڈا میں سکھوں اور کشمیری مسلمانوں کو قتل کروارہی ہے۔
پوسٹرز میں مزید کہا گیا ہے کہ کشمیری اور سکھ پُرامن طریقے سے اپنے سیاسی حقوق کا مطالبہ کررہے ہیں اوردنیا کوہندوتوا نظریے کی حامل مودی حکومت کا محاسبہ کرنا چاہیے۔ پوسٹرز کو فیس بک اور ’ایکس‘ سمیت سوشل میڈیا پلیٹ فارمز پر بھی شیئر کیا گیا ہے۔
