یونائیٹڈ نیشن پاپولیشن فنڈ کے نمائندہ نے نگراں وزیر صحت ڈاکٹر ندیم جان سے ملاقات کی، یو این ایف پی اے نے آبادی کے کنٹرول پر کیے جانے والے پاکستان کے اقدامات کو سراہا اور بھر پور تعاون کرنے کی یقین دہانی کرائی۔
ملاقات میں صحت کے شعبے اور باہمی دلچسپی کے امور پر تبادلہ خیال کیا گیا، نگراں وزیر صحت ڈاکٹر ندیم جان نے کہاکہ وزارت صحت کی جانب سے پاکستان خواتین کنونشن برائے فیملی پلاننگ اور بہبود آبادی کا انعقاد کیا جارہا ہے۔
وزیر صحت نے کہاکہ کنونشن 16 اکتوبر 2023 کو کنونشن سنٹر میں منعقد کیا جا رہا ہے، کنونشن میں ملک کے طول وعرض سے 500 خواتین شرکت کریں گی۔
انہوں نے کہاکہ کنونشن میں اسکالرز سمیت قومی اور بین الاقوامی ماہرین شرکت کر رہے ہیں۔ کانفرنس کا موضوع اسلامی توازن برائے تصور ہوگا۔
ان کا کہنا تھا کہ کانفرنس کا مقصد دیہی خواتین میں آبادی کے مسائل اور فیملی پلاننگ کے حوالے سے آگاہی پیدا کرنا ہے۔
ڈاکٹر ندیم جان نے کہاکہ آبادی اور وسائل میں توازن وقت کی اہم ضرورت ہے، حکومت بڑھتی ہوئی آبادی کو کنٹرول کرنے کے لیے مربوط حکمت عملی کے تحت کام کررہی ہے۔
ندیم جان کا کہنا تھا کہ پاپولیشن کی ٹاسک فورس آبادی کو کنٹرول کرنے کے لیے جامع حکمت عملی پرعمل پیرا ہے۔
