فیفا نے اعلان کیا ہے کہ ورلڈ کپ 2030 تین براعظموں میں کھیلا جائے گا۔ ورلڈ کپ عام طور پر کسی ایک میزبان ملک یا 2 میزبان ممالک تک محدود ہوتا ہے لیکن 2030 کی میزبانی غیر معمولی طور پر کئی ملک کریں گے، اس ایونٹ کی اہم بات یہ ہوگی کہ یہ ورلڈ کپ کی 100ویں سالگرہ بھی ہوگی۔
2030 کی میزبانی کرنے والوں میں اسپین، مراکش،پرتگال، ارجنٹائن، پیراگوئے اور یوروگوئے شامل ہیں۔ اسپین اور پرتگال نے تجویز دی تھی کہ وہ ورلڈ کپ 2030 کی مشترکہ طور پر میزبانی کریں گے۔ ان کی تجویز میں مراکش کو شامل کر لیا گیا تھا پھر حریف ملک ارجنٹائن، پیراگوئے اوریوروگوئے بھی بولی میں شامل ہو گئے تھے۔
جنوبی امریکا کی فٹ بال فیڈریشن کونمیبول کے صدر الیجینڈرو ڈومنگیز نے کہا ہے کہ صد سالہ ورلڈ کپ جنوبی امریکا سے زیادہ دور نہیں ہو سکتا جہاں سے سب کچھ شروع ہوا تھا۔
مزید پڑھیں
بین البراعظمی ٹورنامنٹ کا افتتاح یوروگوئے کے دارالحکومت مونٹے ویڈیو میں ہوگا جہاں 1930 میں فٹبال کا پہلا ورلڈ کپ کھیلا گیا تھا۔ فیفا کے 3 براعظمی ورلڈکپ کے منصوبے کی منظوری دنیا بھر کے 211 ارکان کی سوکر فیڈریشن 2024 میں ایک کانفرنس میں دی جائے گی۔ یہ ووٹنگ روایتی طورپر ایک رسمی کارروائی ہوگی۔
2026 کے ورلڈ کپ کی طرح 2030 کا ورلڈ کپ بھی جون اور جولائی میں ہوگا اس میں 48 ٹیمیں انتہائی با وقار ٹرافی کے لیے مقابلہ کریں گی اور کل 104 میچ کھیلے جائیں گے۔ ٹیموں کو طویل فاصلے طے کرنا ہوں گے اور شرکت کے لیے ٹائم زونز کے مطابق خود کو ایڈجسٹ کرنا ہوگا۔
فیفا کے صدر جیانی انفینٹینو نے کہا ہے کہ 2030 میں 3 براعظم اور 6 ممالک فیفا کی سالگرہ اور فیفا ورلڈ کپ کے خوبصورت کھیل کا جشن مناتے ہوئے دنیا کا خیر مقدم کریں گے اور اسے متحد کریں گے۔ اب ورلڈ کپ 2034 کی بولی کا مقابلہ جلد شروع ہو جائے گا جو فیفا کے رکن ممالک ایشیا اور اوشینیا تک محدود ہوگا۔ سعودی عرب اور آسٹریلیا اس میں دلچسپی کا اظہار کرچکے ہیں۔
