پاکستان مسلم لیگ ن (پی ایم ایل این) کی سینیئر رہنما مریم اورنگزیب نے وضاحت کی ہے کہ پاکستان مسلم لیگ ن کی چیف آرگنائزر مریم نواز نے ’جی سی یونیورسٹی‘ کا دعوت نامہ احتراماً مسترد کیا تھا۔
ن لیگ کی رہنما مریم اورنگ زیب کی جانب سے جاری ایک بیان میں کہا گیا ہے کہ جی سی یونیورسٹی کی طرف سے دعوت نامہ 5 اکتوبر کو چیف آرگنائزر مریم نواز کے دفتر کو موصول ہوا تھا جسے محض احتراماً مسترد کر دیا گیا تھا کیونکہ پی ایم ایل این کا خیال ہے کہ تعلیمی اداروں کی اولین توجہ تعلیم کے اعلیٰ معیار کی فراہمی، اسے برقرار رکھنے اور اچھے اخلاقی اور سماجی طرز عمل کی اقدار کو فروغ دینا ہے۔
مریم اورنگ زیب کا کہنا تھا کہ ذاتی اور سیاسی عزائم کے لیے ان کا استعمال نہیں ہونا چاہیے۔ افسوس کہ ماضی قریب میں گورنمنٹ کالج یونیورسٹی کو ذاتی عزائم اور سیاسی ایجنڈوں کو آگے بڑھانے کے لیے استعمال کیا گیا ہے۔ مسلم لیگ (ن) اسی غلط راستے کے انتخاب کی حمایت نہیں کرتی۔
مریم اورنگ زیب کا کہنا ہے کہ سیاسی اتار چڑھاؤ، رہنما اور وابستگی بدلتی رہتی ہے تاہم ذاتی مفاد صرف توسیع اور اگلے عہدوں تک ہی محدود رہتا ہے۔ چیف آرگنائزر ن لیگ مریم نواز تعلیمی اداروں کا دورہ کرنے کا منصوبہ بنائیں گی تاکہ خاص طور پر اعلیٰ تعلیم کے مقصد کو آگے بڑھایا جائے، مدد کی جائے اور نوجوانوں کو ان کی مکمل صلاحیتوں کو حاصل کرنے کے قابل بنایا جا سکے۔
