سرکاری ملازمین کی مالی مشکلات کم کرنے کے لیے حکومت نے کم از کم ماہانہ تنخواہ 25 ہزار سے بڑھا کر 32 ہزار روپے مقرر کر دی ہے، صدر مملکت عارف علوی نے بھی اس کم از کم تنخواہ میں اضافے کی منظوری دے دی ہے، اب کسی بھی وفاقی سرکاری ملازم کو چاہے وہ کنٹریکٹ پر ہی کیوں نہ ہو کم سے کم ماہانہ 32 ہزار روپے تنخواہ ملے گی۔
گزشتہ سال وفاقی حکومت نے وفاقی سرکاری ملازمین کی کم سے کم تنخواہ 25 ہزار مقرر کی تھی جسے رواں سال بجٹ پیش کرتے ہوئے 32 ہزار روپے کر دیا گیا تھا، تاہم صدر کی جانب سے منظوری نہ ملنے کے باعث ملازمین کی تنخواہوں میں اضافہ نہیں ہو سکا تھا۔ اب صدر مملکت نے سرکاری ملازمین کی کم سے کم تنخواہ 32 ہزار روپے کرنے کی منظوری دے دی ہے۔
وزارت خزانہ کے نوٹیفکیشن کے مطابق تمام سرکاری ملازمین کو یکم جولائی 2023 کے بعد سے 32 ہزار روپے ماہانہ تنخواہ کے حساب سے ادائیگیاں کی جائیں گی جن ملازمین کی تنخواہ اس سے کم ہے انہیں خصوصی الاؤنس بھی دیا جائے گا، وفاقی سرکاری ملازمین سمیت تمام صوبوں میں کام کرنے والے ملازمین کی کم سے کم تنخواہ پہلے سے ہی 32 ہزار روپے ماہانہ مقرر ہے۔
وفاقی سرکاری ملازمین کی تنخواہوں میں اضافے سے ہونے والے اضافی اخراجات کے لیے کوئی ضمنی گرانٹ جاری نہیں کی جائے گی بلکہ اخراجات رواں مالی سال کے بجٹ سے ہی پورے کیے جائیں گے۔
اس سے قبل گزشتہ ہفتے نگراں حکومت نے ایم پی 1، ایم پی 2 ملازمین اور ایم پی 3 افسروں کی تنخواہوں میں اضافہ کیا تھا جس کا اطلاق یکم اکتوبر 2023 سے ہو گیا ہے، 2017 کے ایم پی ون ملازمین کی تنخواہ 33 ہزار روپے اضافے سے 5 لاکھ 32 ہزار، 2023 کے ایم پی ون ملازمین کی تنخواہ 47 ہزار 850 روپے اضافے سے 7 لاکھ 72 ہزار ہو گئی ہے۔
سال 2017 کے ایم پی 2 ملازمین کی تنخواہ 27 ہزار روپے اضافے سے 2 لاکھ 90 ہزار روپے جبکہ 2023 کے ایم پی ٹو ملازمین کی تنخواہ 39 ہزار 480 روپے کے اضافے سے 4 لاکھ 21 ہزار روپے ہو گئی ہے، سال 2017 کے ایم پی 1 افسروں کی تنخواہ 26 ہزار 320 روپے اضافے سے ایک لاکھ 81 ہزار، جبکہ 2023 کے ایم پی 3 افسروں کی تنخواہ 2 لاکھ 63 ہزار روپے ہو گئی ہے۔
