امریکا کی ریاست ہوائی میں ایک تالاب کے پانی کا رنگ غیرمعمولی طور پر گلابی ہوجانے پر لوگوں کی توجہ کا مرکز بن گیا ہے۔
علاقے کے رہائشیوں کا کہنا ہے کہ تالاب کا پانی حالیہ دنوں میں گلابی اور جامنی رنگ میں تبدیل ہو گیا ہے۔ رنگ بدلنے کے بعد تالاب کی ڈرون سے حاصل کی گئی فوٹیج سوشل میڈیا پر وائرل ہو رہی ہے۔
یو ایس فش اینڈ وائلڈ لائف سروس نے بھی تصدیق کی ہے کہ پانی کا رنگ تقریباً 2 ہفتوں سے گلابی ہے۔ تالاب کے پانی کا رنگ تبدیل ہونے کے بارے میں خیال کیا جا رہا ہے کہ یہ زیادہ نمکین پانی میں پائے جانے والے ’ہیلو بیکٹیریا‘ کا نتیجہ ہے۔
پانی کے زہریلا ہونے کے کوئی شواہد حاصل نہیں ہو سکے لیکن مزید جانچ کے لیے نمونے یونیورسٹی آف ہوائی بھیجے گئے ہیں تاکہ پانی کا رنگ تبدیل ہونے کی اصل وجہ معلوم کی جا سکے۔
تالاب کے پانی کا رنگ تبدیل ہونے کی خبر سامنے آتے ہی لوگ دور دراز سے دیکھنے کے لیے بھی آ رہے ہیں۔
