خیبرپختونخوا سے کتنے افغان مہاجرین واپس افغانستان جا چکے ہیں؟

غیر قانونی افغان باشندوں کی وطن واپسی کا سلسلہ جاری ہے۔ گزشتہ روز مزید 2062 غیر قانونی افغان باشندے اپنے ملک چلے گئے۔ مجموعی تعداد 2 لاکھ 37 ہزار سے تجاوز کر گئی۔ پاکستان نے جس فراخدلی سے افغان باشندوں کو اپنے ملک میں پناہ دینے کے ساتھ ساتھ روزگار کے سارے مواقع مہیا کیے اس امر کو عالمی سطح پر بھی سراہا گیا۔

پاکستان نے ہمیشہ ایک ذمہ دار اور بہترین ہمسایہ ملک ہونے کا کردار ادا کیا جس کی دنیا میں کوئی مثال نہیں ملتی۔ 31 اکتوبر کی ڈیڈ لائن ختم ہونے کے بعد صرف غیر قانونی افغان باشندوں کا پاکستان سے محفوظ اور باعزت انخلاء یقینی  بنایا جا رہا ہے۔ چمن اور طورخم بارڈر پر روزانہ کی بنیاد پر ہزاروں افغان باشندے اپنے وطن واپس جا رہے ہیں اور پاکستان کی فراخدلی کا شکریہ ادا کر رہے ہیں۔

گزشتہ روز افغانستان واپس جانے والوں میں  591 مرد، 443 خواتین اور 1،028 بچے شامل ہیں۔ افغانستان روانگی کے لیے 214 گاڑیوں میں 376  خاندانوں کی اپنے وطن واپسی عمل میں لائی گئی ہے۔ اب تک کل 2 لاکھ 37 ہزار 883 غیر قانونی طور پر مقیم افغان باشندوں کی وطن واپسی ہوچکی ہے۔ باعزت طریقے سے افغانستان واپسی کے لیے دیگر اقدامات کے علاوہ عارضی رہائش کے لیے مختلف اضلاع میں تمام سہولیات سے آراستہ ٹرانزٹ کیمپس قائم کئے گئے ہیں۔