رینجرز اور واٹر اینڈ سیوریج بورڈ نے کراچی کے مختلف علاقوں میں مشترکہ کارروائی کر کے غیرقانونی ہائیڈرنٹس کے کاروبار سے منسلک 161 ملزمان گرفتار کر لیے۔
پانی کے غیر قانونی کنکشن کے خاتمے اور میٹھے پانی کی چوری کے 29 کنکشن ختم کے لیے کراچی کے علاقوں لیاقت آباد ٹاؤن، جمشید ٹاؤن اور ناظم آباد ٹاؤن میں آپریشن کیا گیا۔
آپریشن کے دوران 4 ملزمان کو گرفتارکرکے پولیس کے حوالے کیا گیا جبکہ واٹر اینڈسیوریج بورڈ کارپوریشن کی مدعیت میں ملزمان کے خلاف 12 ایف آئی آرز بھی درج کرائی گئی ہیں۔
پاکستان رینجرز کا کہنا ہے کہ آپریشنز کے بعد 208 لاکھ گیلن یومیہ پانی کی فراہمی بحال کر دی گئی ہے، پانی چوری کی مد میں تقریباً ڈیڑھ ارب روپے سالانہ قومی خزانے کو نقصان ہو رہا تھا۔
ترجمان پاکستان رینجرز کے مطابق واٹر اینڈ سیوریج بورڈ کارپوریشن اور پاکستان رینجرز کا غیر قانونی ہائیڈرنٹس کے خلاف مشترکہ آپریشن جاری ہے۔
پاکستان رینجرز اور واٹر اینڈ سیوریج بورڈ کارپوریشن نے مجموعی طور پر پانی چوری کرنے والوں کے خلاف اب تک 92آپریشنز کیے ہیں، اس دوران 204 غیرقانونی ہائیڈرنٹس میں سے 29 مہر بند اور 175 مسمار کیے گئے، 161ملزمان کی گرفتاری عمل میں لائی گئی۔
