پاکستان تحریک انصاف (پی ٹی آئی) نے عام انتخابات کو التوا کا شکار کرنے کی کسی بھی براہِ راست یا بالواسطہ کوشش سے گریز کی ضرورت پر زور دیا ہے۔
مختلف بار کونسلز اور بار ایسوسی ایشنز کی جانب سے چیف الیکشن کمشنر کے حوالے سے جاری کیے گئے اعلامیوں پر ردعمل دیتے ہوئے ترجمان پی ٹی آئی نے کہاکہ اعلامیوں کے بیشتر مندرجات چیف الیکشن کمشنر کے حوالے سے تحریک انصاف کے موقف کی تائید و توثیق کرتے ہیں۔
ترجمان نے کہاکہ تحریک انصاف گزشتہ 4 برس سے بالعموم جبکہ پچھلے 2 سالوں سے بالخصوص چیف الیکشن کمشنر کے فیصلوں میں پائے جانے والے غیرآئینی و غیرقانونی رجحانات کی نشاندہی کررہی ہے۔
مزید پڑھیں
ترجمان کے مطابق الیکشن کمیشن آف پاکستان میں اراکین کی تعیناتیوں سے لے کر چیف الیکشن کمشنر کی متعصّبانہ سوچ، غیرشفاف کردار اور کمیشن کے امتیازی اقدامات پر تحریک انصاف کا موقف بالکل واضح اور غیر مبہم رہا ہے۔
انہوں نے کہاکہ چیف الیکشن کمشنر کے خلاف سپریم جوڈیشل کونسل میں سینیٹر اعجاز احمد چوہدری کا زیرِالتوا ریفرنس ان کے خلاف تحریک انصاف کے موقف کی کھلی دلیل ہے۔
پی ٹی آئی ترجمان نے کہاکہ پنجاب اور خیبر پختونخوا کی اسمبلیوں کی تحلیل کے بعد دونوں صوبوں میں آئینی مدت میں انتخابات سے گریز کی تحریک انصاف شدید ترین ناقد رہی ہے۔
’90 روز کی دستوری مدت میں قومی انتخابات کے انعقاد سے گریز کی الیکشن کمیشن کی حکمتِ عملی کی مزاحمت میں بھی تحریک انصاف پیش پیش رہی ہے‘۔
انتخابات کو شفاف بنانے پر اپنی توانائیاں مرکوز کی جائیں
انہوں نے کہاکہ ان 20 ماہ کے دوران تحریک انصاف وکلا تنظمیوں اور کونسلز کو الیکشن کمیشن کے غیردستوری، غیرقانونی اور غیرجمہوری ایجنڈے کے خلاف مزاحمت کی دعوت دیتی رہی۔
ترجمان کے مطابق الیکشن کمیشن آف پاکستان خصوصاً چیف الیکشن کمشنر کے متعصّبانہ کردار کی پوری تاریخ کے باوجود تحریک انصاف انتخابات کے 8 فروری کے بعد ایک روز کی تاخیر کی بھی قائل نہیں۔
پی ٹی آئی ترجمان کے مطابق ملک و قوم کا مفاد انتخابات کے فوری، آزادانہ، منصفانہ اور شفاف انعقاد میں پوشیدہ ہے، جو موجوہ چیف الیکشن کمشنر کے اپنے منصب پر بیٹھے رہنے میں نظر نہیں آتا۔
انہوں نے کہاکہ سول سوسائٹی خصوصاً وکلا تنظیمیں 8 فروری کو ہونے والے انتخابات کے صاف شفاف انعقاد کے بنیادی ہدف کے حصول پر اپنی توانائیاں مرکوز کریں۔
ترجمان کا کہنا تھا کہ چیف الیکشن کمشنر دستور سے انحراف کی راہ ترک کرکے اپنے آئینی فرض کی انجام دہی یقینی بنائیں اور صاف شفاف انتخابات کے ذریعے کمیشن کے دامن پر لگے دھبّوں کی صفائی کا اہتمام کریں۔
