سول جج اینڈ جوڈیشل مجسٹریٹ 1 سکھر عدالت نے آن لائن جنسی ہراسانی اور بلیک میلنگ کے مقدمے کا فیصلہ سناتے ہوئے مجرم کو 3 سال قید با مشقت کی سزا سنائی ہے۔
مزید پڑھیں
ترجمان فیڈرل انوسٹی گیشن ایجنسی ( ایف آئی اے) کے ترجمان کے مطابق جمعرات کو مقدمے کی سماعت مکمل ہونے پر سول جج اینڈ جوڈیشل مجسٹریٹ 1 سکھر فاروق احمد میتلو نے ملزم کو مجموعی طور پر 3 سال قید با مشقت کی سزا سنائی ہے، ملزم پرآن لائن جنسی ہراسانی اور بلیک میلنگ میں ملوث ہونے کا الزام تھا، عدالتی تحقیقات کے بعد فہد منگی نامی شخص پر آن لائن جنسی ہراسانی کا جرم ثابت ہونے پر سزا سنائی گئی ۔
مجرم کے خلاف سال 2023 میں سائبر کرائم سکھر میں مقدمہ درج کیا گیا تھا، مجرم کو پیکا ایکٹ 2016 کی دفعہ 20 کے تحت 1 سال 6 ماہ قید بامشقت جبکہ دفعہ 21 کے تحت 1 سال 6 ماہ قید بامشقت سنائی گئی ہے۔
ملزم کی ضمانت موقع پر ہی منسوخ کر دی گئی۔ معزز عدالت نے مجرم کو سینٹرل جیل سکھر کے حوالے کرنے کے احکامات جاری کیے گئے ہیں، ایف آئی اے کی جانب سے اسسٹنٹ ڈائریکٹر منیر احمد سیال نے مقدمے کی پیروی کی۔
