وزیر اطلاعات پنجاب عظمیٰ بخاری نے کہا ہے کہ رمضان پیکج کی تقسیم آج سے پنجاب کے ہر ضلع میں شروع کر دی جائے گی جو 20 رمضان المبارک تک جاری رہے گی۔
لاہور میں میڈیا سے گفتگو کرتے ہوئے عظمیٰ بخاری نے کہا کہ رمضان پیکج سے متعلق سوشل میڈیا پرپراپیگنڈا کیا جا رہا ہے۔ ایک لاکھ سے زائد خاندانوں کو ان کے گھر کی دہلیز پر رمضان پیکج بھجوایا جارہا ہے۔ گھر، گھر رمضان پیکج بھجوانے پر اضافی خرچ آرہا ہے۔ وزیراعلیٰ مریم نواز نے حکم دیا ہے کہ رمضان پیکج کے معیار پر سمجھوتا نہیں کیا جائے گا۔
مزید پڑھیں
عظمیٰ بخاری نے کہا کہ رمضان پیکج بے نظیر انکم سپورٹ پروگرام کے ذریعے دیا جارہا ہے، ابھی تک رمضان پیکج کے 15 لاکھ تھیلے تقسیم کیے جا چکے ہیں۔ ڈیٹا میں مسائل کے باعث کئی مستحقین رمضان پیکج سے محروم رہ گئے ہیں، ایسے تمام افراد رمضان پیکج سے متعلق خصوصی ہیلپ لائن پر شکایت درج کرا سکتے ہیں۔
وزیر اطلاعات پنجاب کا کہنا تھا کہ وزیراعلیٰ مریم نواز نے ذخیرہ اندوزوں کے خلاف کارروائی کرنے کے ساتھ ساتھ پیاز اور کیلے کو صوبے سے باہر بھجوانے پر پابندی کا حکم دیا ہے۔ مہنگائی پر قابو پانے اور قیمتوں میں استحکام کے لیے ایک الگ محکمہ قائم کیا گیا ہے۔
