افراتفری اور بے چینی کے اس دور میں چین کی ایک کمپنی نے اپنے ملازمین کو چین اور اطمینان فراہم کرنے کے لیے ایک ایسی انوکھی پالیسی متعارف کرائی ہے جس کی خواہش یقیناً دنیا کا ہر ورکر رکھتا ہے۔ اس کمپنی نے اپنے ملازمین سے کہا ہے کہ اگر وہ اداسی محسوس کررہے ہیں تو وہ 10 دن کی چھٹی لے کر گھر پر آرام کرسکتے ہیں۔
مزید پڑھیں
اس انوکھی پالیسی کا اعلان چین کی ایک ریٹیل کمپنی نے کیا ہے جس کا مقصد کام اور دیگر زندگی معمولات زندگی میں ایک توازن قائم کرنا ہے۔ ریٹیل چینی کمپنی پینگ ڈونگ لائی کے بانی اور چیئرمین یو ڈونگلائی نے اس پالیسی کا اعلان کرتے ہوئے کہا ہے کہ ملازمین اب اپنی سہولت کے مطابق 10 دن کی چھٹی کی اضافی درخواست دینے کے اہل ہوں گے۔ یہ چھٹیاں 20 سے 40 دنوں کی سالانہ اور ہفتہ وار چھٹیوں کے علاوہ ہیں۔
انہوں نے اپنے ملازمین سے کہا کہ ہر کسی کی زندگی میں اداسی کے لمحات آتے ہیں، لہٰذا اگر آپ ناخوش یا اداس ہیں تو آپ کام پر نہ آئیں، آپ کی ’رخصت بوجہ اداسی‘ کی درخواست کو انتظامیہ مسترد نہیں کرے گی۔ ان کا کہنا تھا ہم اپنے ملازمین کو تندرست و توانا اور مطمئن دیکھنا چاہتے ہیں جس کا کمپنی کو بھی فائدہ ہوگا۔
واضح رہے کہ چین میں کام کی جگہوں پر عدم اطمینان اور بے چینی سے متعلق 2021 میں کیے گئے ایک سروے کے مطابق، ملک میں 65 فیصد ملازمین کام کی جگہوں پر تھکاوٹ اور اداسی محسوس کرتے ہیں۔
