ملک میں ہونے والے ضمنی انتخابات کے موقع پر 21 اور 22 اپریل کو پنجاب اور بلوچستان کے چند اضلاع میں موبائل و انٹرنیٹ سروس بند رکھنے کا فیصلہ کیا گیا ہے۔
پاکستان ٹیلی کمیونیکیشن اتھارٹی (پی ٹی اے) کے مطابق وزارت داخلہ کی ہدایات کی روشنی میں موبائل فون سروس پنجاب اور بلوچستان کے کچھ اضلاع میں عارضی طور پر بند رکھنے کا فیصلہ کیا گیا ہے۔
مزید پڑھیں
پی ٹی اے نے بتایا کہ انتخابی عمل کو شفاف انداز میں پایہ تکمیل تک پہنچانے کے لیے سروس بند کرنے کا فیصلہ کیا گیا ہے۔
واضح رہے کہ کل 21 اپریل کو پنجاب، خیبرپختونخوا اور بلوچستان کے مختلف اضلاع میں ضمنی الیکشن کے لیے پولنگ ہوگی۔
’قومی اسمبلی کے 5 جبکہ صوبائی اسمبلیوں کے 16 حلقوں میں ضمنی انتخابات کے لیے پولنگ ہوگی‘۔
اس موقع پر محکمہ داخلہ پنجاب نے سفارش کی ہے کہ صوبے کے 13 اضلاع میں موبائل فون اور انٹرنیٹ سروس بند رکھی جائے۔
دوسری جانب الیکشن کمیشن آف پاکستان نے ضمنی انتخابات کے لیے تمام تر انتظامات مکمل کرلیے ہیں اور سیکیورٹی کے بھی فول پروف انتظامات کیے گئے ہیں۔
