سیکیورٹی فورسز نے بلوچستان کے ضلع ہرنائی میں مسافر گاڑیوں کو روکنے کی کوشش ناکام بناتے ہوئے ایک دہشتگرد کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع ہرنائی میں فورسز اور دہشتگردوں کے درمیان فائرنگ کا تبادلہ ہوا ہے۔
مزید پڑھیں
آئی ایس پی آر نے بتایا کہ دہشتگردوں نے سنجاوی روڈ، ہرنائی پر چلنے والی مسافر گاڑیوں کو روکنے کی کوشش کی تو اس موقع پر سیکیورٹی فورسز نے ان کے خلاف کارروائی کی۔
ترجمان کے مطابق سیکیورٹی فورسز کی کارروائی کے دوران ایک دہشتگرد ہلاک ہوگیا جبکہ دوسرا زخمی ہوا۔
آئی ایس پی آر کے مطابق سیکورٹی فورسز کے بروقت جواب نے دہشتگردوں کے مذموم عزائم کو ناکام بنا دیا اور معصوم جانیں بچ گئیں۔
ترجمان کے مطابق علاقے میں کسی بھی دہشتگرد کے خاتمے کے لیے کلیئرنس آپریشن کیا جارہا ہے۔
آئی ایس پی آر نے بتایا کہ پاکستان کی سیکیورٹی فورسز قوم کے ساتھ مل کر بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں۔
