پنجاب میں ماحولیاتی آلودگی کو کم کرنے کے لیے بڑے آپریشن کا آغاز کردیا گیا ہے۔
وزیراعلیٰ پنجاب مریم نواز شریف کی ہدایت پر پنجاب میں ائیر کوالٹی بہتر کرنے اور اسموگ کم کرنے کے پلان پر عمل درآمد کے دوسرے مرحلے کا آغاز کردیا گیا ہے۔
ماحولیاتی قوانین کی خلاف ورزی پر صوبہ پنجاب میں گرینڈ آپریشن شروع کر دیا گیا ہے، انسانی صحت کے قاتل زہریلا دھواں پھیلانے والی فیکٹریوں پر ماحولیاتی تحفظ کے ادارے (ای پی اے) نے چھاپے مارنا شروع کردیے ہیں۔
مزید پڑھیں
ای پی اے کی ٹیموں نے لاہور سیالکوٹ موٹر وے پر کارروائیاں بھی کی ہیں، آنے والے دنوں میں ماحولیاتی آلودگی، زہریلے مادوں کے اخراج اور اسموگ کی وجہ بننے والی فیکٹریوں کے خلاف کارروائیاں مزید تیز کی جائیں گی۔
وزیر اعلی پنجاب کی ہدایت پر انسانی صحت کے لیے مضر اور کینسر سمیت مہلک بیماریاں پیدا کرنے والے دھوئیں کے تدارک کے ٹاسک پر بھی عملدرآمد شروع کردیا ہے، ان اقدامات سے ائیرکوالٹی انڈیکس بہتر اور اسموگ کی صورت حال میں بھی بہتری آئے گی۔
زیادہ دھواں پیدا کرنے والے علاقوں کی میپنگ بھی شروع کر دی گئی ہے، دھوئیں کی مقدار جانچنے کے جدید آلات سے بھی مدد لی جائے گی، قانون سازی کے لیے بھی کام تیز کر دیا گیا، قانون سازی سے سزائیں اور بھاری جرمانے کیے جائیں گے۔
سینئر وزیر پنجاب مریم اورنگزیب نے صنعتوں کو ماحولیاتی قوانین پر عملدرآمد اور ائیر کوالٹی بہتر بنانے کی مہم میں بھرپور ساتھ دینے کی اپیل کی ہے۔
مریم اورنگزیب نے کہا ہے کہ جدید آلات اور طریقوں کو اختیار کریں تاکہ سب بیماریوں سے محفوظ ہوں، درخت، پرندے اور انسان سب صاف فضا میں سانس لے سکیں۔
