ڈیرہ بگٹی: الیکشن ٹریبونل نے صوبائی نشست پر دھاندلی کے ثبوت طلب کرلیے

الیکشن ٹریبونل نے حلقہ پی بی 10 ڈیرہ بگٹی کے انتخابات میں مبینہ دھاندلی کے ثبوت اور گواہان طلب کرلیے۔

حلقہ پی بی 10 کے حوالے سے انتخابی عذرداری پر سماعت جسٹس روزی خان بڑیچ نے کی سماعت کے دوران عدالت نے درخواست گزار نوابزادہ گہرام بگٹی سے الیکشن میں دھاندلی کے حوالے سے ثبوت اور گواہان کو طلب کر لیا۔

مخالف فریق وزیر اعلیٰ بلوچستان اور پیپلزپارٹی کے رہنما میر سرفراز بگٹی کی جانب سے جواب دعویٰ داخل کیا گیا۔

جواب دعویٰ کی کاپی درخواست گزار کے وکیل کے حوالے کی گئی۔ سماعت میں درخواست گزار نوابزادہ گہرام بگٹی کی جانب سے ایڈووکیٹ راجیش کوہلی پیش ہوئے جبکہ وزیر اعلیٰ بلوچستان میر سرفراز بگٹی کی پیروی ایڈووکیٹ جنرل آصف ریکی، ایڈووکیٹ جمیل آغا اور عدنان مرتضیٰ نے کی۔

کیس کی سماعت 6 مئی تک ملتوی کر دی گئی۔ جے ڈبلیو پی کے نوابزادہ گہرام بگٹی نے پی بی 10 پر میر سرفراز بگٹی کی کامیابی کو چیلنج کیا ہے۔