پنجاب پولیس نے سندھ اور پنجاب کے کچے کے سرحدی علاقے میں کارروائی کرتے ہوئے 2 ڈاکو ہلاک کردیے جبکہ 7 ڈاکو زخمی ہوئے ہیں۔
ڈی پی او رحیم یار خان رضوان گوندل نے میڈیا کو بتایا ہے کہ آپریشن میں مارے جانے والے ڈاکوؤں کی شناخت عالم شر اور نذیر شر کے نام سے ہوئی ہے جبکہ مٹھا شر سمیت 7 ڈاکو زخمی بھی ہوئے۔
مزید پڑھیں
ڈی پی او نے کہاکہ پولیس کا مختلف مقامات پر ڈاکوؤں کے ساتھ مقابلہ چل رہا ہے، جس میں ماچھکہ بھونگ، صادق آباد اور کوٹ سبزل کی پولیس نفری بھی شریک ہے۔ جبکہ راجن پور اور گھوٹکی پولیس کو بھی طلب کیا گیا ہے۔
انہوں نے کہاکہ بگٹی قبیلے کے رضاکار بھی ڈاکوؤں کے خلاف آپریشن میں پولیس کی معاونت کررہے ہیں۔
دوسری جانب انسپکٹر جنرل پولیس پنجاب عثمان انور نے نجی ٹی وی سے گفتگو کرتے ہوئے کہاکہ ڈاکوؤں کے خلاف آپریشن میں رینجرز کی جانب سے پولیس کے ساتھ تعاون کیا جارہا ہے۔ جبکہ سندھ پولیس بھی ساتھ دے رہی ہے۔
انہوں نے کہاکہ پولیس مختلف اداروں کے ساتھ رابطے میں ہے، رضاکاروں کی جانب سے صرف خفیہ معلومات فراہم کی جاتی ہیں۔
