سندھ ہائیکورٹ نے پاکستان تحریک انصاف کو کراچی میں جلسے کی اجازت نا دینے کے لیے محکمہ داخلہ اور ڈپٹی کمشنر کی رپورٹ مسترد کردی ہے، عدالت نے حکم دیا ہے کہ پی ٹی آئی کی درخواست پر 10 دن میں فیصلہ کیا جائے۔
پی ٹی آئی کو کراچی میں جلسے کی اجازت کے لیے درخواست کی سماعت چیف جسٹس سندھ ہائیکورٹ عقیل عباسی نے کی۔
مزید پڑھیں
کیس کی سماعت کے دوران چیف جسٹس عقیل عباسی نے ریمارکس دیے کہ ممکن ہو تو پی ٹی آئی کو رضا مندی سے کسی متبادل مقام پر جلسہ کی اجازت دی جائے، چیف جسٹس نے ریمارکس دیے کہ معذرت کے ساتھ رپورٹ میں ساری ایجنسیوں کے نالائقی چھلک رہی ہے، اگر ہرزہ سرائی کریں تو قانون کے مطابق کارروائی کی جائے، جلسہ کرنا ان کا حق ہے، کب تک آپ لوگ ایسے معاملات چلائیں گے ؟ بچہ بچہ جانتا ہے کس کی لڑائی ہے۔
جسٹس عقیل عباسی نے ریمارکس دیے کہ قومی مفاد یہ ہے کہ آئین کا تحفظ ہو ، آپ ان پرمکمل پابندی لگانا چاہتے ہیں تو اس کے لیے درخواست لائیں، قانون اجازت دے گا تو فوری پابندی لگانے کا حکم دے دیں گے، ادارے اور ساری ایجنسیاں بیٹھ گئیں جلسہ کیسے روکا جائے؟ دوسرا جلسہ ہوا سب سورہے تھے۔
چیف جسٹس نے ریمارکس دیے کہ دوسرے لوگ جلسہ کرگئے، کہتے ہیں اجازت نہیں لی، آپ کی اجازت کے بغیر کوئی کرسکتا ہے کچھ؟ ہمیں کسی پارٹی سے کچھ لینا دینا نہیں، آپ بیٹھیں اور جائزہ لے کر ان کو جلسہ کی اجازت دیں، ہمین وہاں مت لے جائیں کہ ہمیں بہت سخت حکم دینا پڑے۔
معزز جج نے سرکاری وکیل سے مکالمہ کرتے ہوئے ریمارکس دیے کہ بہت آسان ہے عدلیہ کے خلاف بات کرنا، آپ سب ہیں اس کے پیچھے، بہت آسان سے سوشل میڈیا پر عدلیہ کے خلاف مہم چلانا ، آپ کام ایسے کریں کہ عدالت آپ کے خلاف فیصلے نا دے۔
چیف جسٹس نے ریمارکس دیے کہ کیا یہ خلائی مخلوق ہیں اس ملک کے شہری نہیں ہیں ؟؟ یا ڈیکلیئر کردیں کہ یہ لوگ ایلینز ہیں، 2 مئی کو جلسہ ہوا تھا اس کی کیا رپورٹ تھی آپ کے پاس، کرفیو لگا دیں اور لوگوں کے گھروں تک راشن پہنچائیں، قومی مفاد وہی ہے جو وہ سمجھتے ہیں ؟؟ قومی مفاد تو لوگوں کا ہوتا ہے یا افراد کا، یہ انڈیا پاکستان کی جنگ کا معاملہ تو نہیں ہے۔
چیف جسٹس سندھ ہائیکورٹ عقیل احمد عباسی نے حکم دیا کہ جلسے کی اجازت نہ دینے کا کوئی جواز نہیں، متعلقہ ادارے پی ٹی آئی کی درخواست پر 10 دن میں فیصلہ کریں۔
