ایجبسٹن اسٹیڈیم اگلے ماہ بھارت اور پاکستان کے آئی سی سی ٹی20 ورلڈ کپ کے میچ کے لیے ایک بڑے فین پارک میں تبدیل ہونے کے لیے تیار ہے۔ پہلی بار آئی سی سی برطانیہ کے شائقین کو ایجبسٹن اسٹیڈیم سے لائیو دیکھنے کا موقع دے رہا ہے، جہاں شائقین ایک بڑی اسکرین پر ایکشن دیکھ سکیں گے۔
EDGBASTON STADIUM WILL TURN INTO FANPARK FOR THE INDIA VS PAKISTAN MATCH ON 9TH JUNE.
– Fans can watch the live streaming of match from the stadium. pic.twitter.com/0E3DPptElV
— Mufaddal Vohra (@mufaddal_vohra) May 16, 2024
ہر بار کی طرح اس بار بھی کرکٹ شائقین کو پاکستان اور بھارت کے درمیان ہائی وولٹیج ٹاکرے کا بے چینی سے انتظار ہے، تاہم پوری دنیا سے کرکٹ شائقین اس ٹاکرے کو دیکھنے کے لیے پہنچ جاتے ہیں، اور جہاں جہاں کرکٹ شائقین موجود ہیں وہ بڑی اسکرینوں پر اس میچ سے لطف اندوز ہوتے ہیں۔
مزید پڑھیں
اس بار امریکا اور ویسٹ انڈیز میں ہونے والے آئی سی سی ٹی20 ورلڈ کپ کی ایک خاص بات یہ ہے کہ آئی سی سی نے پاک بھارت میچ کے لیے برطانیہ کے ایجبسٹن کرکٹ اسٹیڈیم میں بڑی اسکرین نصب کرنے کا فیصلہ کیا ہے، جہاں پاک بھارت میچ کی لائیو اسٹریمنگ دکھائی جائے گی۔
ایجبسٹن میں کرکٹ شائقین بڑے مقابلے سے لطف اندوز تو ہوں گے ہی لیکن ساتھ ہی موسیقی اور انٹرٹینمنٹ کا تڑکا بھی ہوگا۔ شائقین کامیڈین اور کرکٹ کمنٹیٹر عاطف نواز کے ساتھ اسٹیج پر آنے کے بعد ہندوستان اور پاکستان کے سابق کھلاڑیوں سے لطف اندوز ہوں گے۔
خیال رہے آئی سی سی کی جانب سے عالمی سطح پر بڑی اسکرین نصب کرنے کے لیے گراؤنڈ کی تصدیق کردی گئی ہے، اتوار 9 جون کو ایجبسٹن میں کھیل کے لیے 8ہزار سے زائد شائقین کے جمع ہونے کی توقع بھی کی جارہی ہے۔
ایجبسٹن کے چیف ایگزیکٹیو سٹورٹ کین نے کہا کہ ہم ملک میں واحد مقام ہیں جسے آئی سی سی نے ٹی20 ورلڈ کپ کے فین زون کے مقام کے طور پر منتخب کیا ہے جو حیرت انگیز ہے۔
واضح رہے میچ کو لائیو کمنٹری کے ساتھ بڑی اسکرینوں پر دیکھنے کے علاوہ شائقین ایک بڑے فیملی پکنک ایریا تک بھی رسائی حاصل کر سکیں گے جس میں کرکٹ اسکل چیلنجز اور ہندوستانی اور پاکستان دونوں کمیونٹیز کی ثقافتی پرفارمنسز شامل ہیں۔
